வடவள்ளி; வடவள்ளியில், தமிழ்நாடு பிராமணர் சங்கம் வடவள்ளி கிளை மற்றும் ஞானம் பவுண்டேஷன் இணைந்து, உலக மக்கள் நலம் பெற வேண்டி ம்ருத்யுஞ்சய ஹோமம் நடந்தது.

தமிழ்நாடு பிராமணர் சங்கம் மற்றும் ஞானம் பவுண்டேஷன் இணைந்து, ஆண்டுதோறும், ஆங்கில புத்தாண்டின் முதல் ஞாயிற்றுக்கிழமை, உலக மக்கள் நலம் பெற வேண்டி, ம்ருத்யுஞ்சய ஹோமம் நடத்தப்பட்டு வருகிறது. அதன்படி, இந்த ஆங்கில புத்தாண்டின் முதல் ஞாயிற்றுக்கிழமையான நேற்று, தமிழ்நாடு பிராமணர் சங்கம் வடவள்ளி கிளை மற்றும் ஞானம் பவுண்டேஷன் சார்பில், உலக மக்கள் நோய் நொடியின்றி ஆரோக்கியமாக வாழ, சிவபெருமானை வேண்டி, ம்ருத்யுஞ்சய ஹோமம், வடவள்ளியில் உள்ள தாம்ப்ராஸ் கட்டடத்தில் நடந்தது. இதில் ஸ்ரீ கணபதி வாத்தியார் ஒருங்கிணைப்பில், 10 வேத விற்பன்னர்கள் ஹோமங்களை நடத்தினர். இதில், வடவள்ளி கிளை தலைவர் சங்கரன், பொதுச் செயலாளர் பாண்டுரங்கன், உப தலைவர் சீனிவாசன், இளைஞர் அணி தலைவர் கண்ணன், சங்க நிர்வாகிகள், உறுப்பினர்கள் மற்றும் பொதுமக்கள் கலந்து கொண்டனர்.