மயிலாடுதுறை; மயிலாடுதுறை மாவட்டம் தரங்கம்பாடி தாலுகா மருதூர் கிராமத்தில் அமைந்துள்ள பிரசித்தி பெற்ற ஸ்ரீ ராம வரதாஹினி மடத்தில் இன்று அனுமன் ஜெயந்தி விழா வெகு விமர்சை யாக நடைபெற்றது.  அனுமன் ஜெயந்தியை யொட்டி மடத்தில் எழுந்தருளியுள்ள ஆஞ்சநேயர் சுவாமிக்கு  அனுக்ஞை, விக்னேஸ்வர பூஜைகளுடன் ஆஞ்சநேய சுவாமி மூலமந்திர ஹோமம், சதுர்வேத சமர்ப்பணம் செய்யப்பட்டு தருமபுரம் ஆதீனம் கட்டளை விசாரணை ஸ்ரீமத் சுப்ரமணிய தம்பிரான் சுவாமிகள் முன்னிலையில் மூலமந்திர ஹோமம் பூர்ணாஹூதி, மகா தீபாராதனை நடைபெற்றது. தொடர்ந்து கடம் புறப்பட்டு  செய்யப்பட்டுகோயிலை வலம் வந்து ஆஞ்சநேய சுவாமிக்கு சிறப்பு அபிஷேக, ஆராதனைகள் நடத்தப்பட்டன.  இதனை அடுத்து சுப்ரமணிய தம்பிரான் சுவாமிகள், கோ பூஜை, அசுவ பூஜை, ஒட்டகத்திற்கு சௌந்தர்யா பூஜை செய்து பக்தர்களுக்கு அருளாசி வழங்கினார். சிறந்த தவில் வித்வான் பன்னீர்செல்வம், நாதஸ்வர வித்வான் பாலமுருகன் ஆகியோருக்கு விருதுகள் வழங்கி கவுரவித்தார். தொடர்ந்து அயோத்தி ராம ஜெம்ம பூமியில் 22ம் தேதி ராமர் திருமேனி பிரதிஷ்டை செய்யப்படுவதையொட்டி பக்தர்களுக்கு ராமர் கோயில் படம், அட்சதை பிரசாதங்களை வழங்கினார். இதில் சாம்பசிவம் கோயில் நிர்வாகிகள் உட்பட திரளான பக்தர்கள் கலந்து கொண்டு தரிசனம் செய்தனர். அனுமன் ஜெயந்தி  விழா ஏற்பாடுகளை  சாய் விக்னேஷ் செய்திருந்தார். இதேபோல் பிரசித்திபெற்ற மயிலாடுதுறை ரயிலடி ஆஞ்சநேயர் கோயில், திருவிழந்தூர் ஆஞ்சநேயர் கோயில், ஆனந்தமங்கலம் ஆஞ்சநேயர் கோவில், சீர்காழி படித்துறை ஆஞ்சநேயர் கோவில் உள்ளிட்ட பல்வேறு கோவில்களில் அனுமன் ஜெயந்தியை முன்னிட்டு சிறப்பு அபிஷேக, ஆராதனைகள் நடைபெற்றது.