கோவை; அயோத்தி ராமர் கோவில் கும்பாபிஷேகத்தில் கலந்து கொண்டு கோவை திரும்பிய ஜீயருக்கு, உற்சாக வரவேற்பு அளிக்கப்பட்டது.

உலகமே எதிர்பார்த்து காத்திருந்த அயோத்தி ராமர் கோவில் கும்பாபிஷேகம் வெகு விமர்சையாக நடந்தது. இதில், நாட்டின் பல்வேறு பகுதிகளில் இருந்தும், பல்வேறு ஆதினங்கள், துறவிகள், ஜீயர்கள் கலந்து கொண்டனர். இந்நிலையில், அயோத்தி ராமர் கோவில் கும்பாபிஷேகத்தில், கலந்து கொண்டு, நேற்று கோவை திரும்பிய, கொங்கு மண்டலம், ரங்கநாதன் கோவில் ஸ்ரீ ஸ்ரீ ஸ்ரீ நாராயண ஜீயர் சுவாமிகளுக்கு, பக்தர்கள், கோவை விமான நிலையத்தில் உற்சாக வரவேற்பு அளித்தனர். ஸ்ரீ ஸ்ரீ ஸ்ரீ நாராயண ஜீயர் சுவாமிகள் கூறுகையில்,"பல நூறு ஆண்டுகளாக காத்திருந்த வரலாற்று சிறப்பு மிக்க நிகழ்வில் கலந்து கொண்டது பாக்கியம். பகவானை தரிசித்தபோது, எல்லை இல்லா ஆனந்தம் அடைந்தேன். விழாவிற்கு மக்கள் கடல்போல குவிந்தனர். அனைவருக்கும் தேவையான அனைத்து ஏற்பாடுகளும் சிறப்பாக அமைக்கப்பட்டிருந்தது,"என்றார்.