திருவனந்தபுரம்; சபரிமலை மகர விளக்கு காலத்தில் கடந்த 12ம் தேதி காணாமல் போன சென்னை பக்தர் கொல்லம் ரயில் நிலையத்தில் மயங்கிய நிலையில் மீட்கப்பட்டார்.

சென்னை சிற்றிலபாக்கத்தை சேர்ந்தவர் கருணாநிதி 58. கடந்த 10-ம் தேதி இவர் 72 பேர் அடங்கிய குழுவினருடன் சபரிமலையில் தரிசனத்திற்காக சென்றார். தரிசனத்தை முடித்து அனைவரும் 12-ல் சபரிமலையில் இருந்து திரும்ப புறப்பட்டபோது நிலக்கலில் கருணாநிதி மாயமானார்.உடன் வந்த பக்தர்கள் நீண்ட நேரம் தேடியும் அவரைக் கண்டுபிடிக்க முடியாததால் இவருக்கு லேசான ஞாபக மறதி இருந்ததாகவும் கூறி பம்பை போலீஸ் நிலையத்தில் புகார் அளித்து ஊருக்கு திரும்பினர் . இந்நிலையில் கடந்த 20 -ம் தேதி ஒருவர் கொல்லம் ரயில் நிலையத்தில் மயங்கி நிலையில் மீட்கப்பட்டு கொல்லம் அரசு மருத்துவமனையில் அனுமதித்தனர். அங்கு சிகிச்சை பெற்று வந்த அந்த நபர் மாயமானார் கடந்த இரண்டு நாட்களுக்கு முன்பு அதே ரயில் நிலையத்தில் கையில் காயங்களுடன் அந்த நபர் மயங்கி கிடந்ததை கண்ட ஆட்டோ டிரைவர்கள் அவரை மீட்டு மீண்டும் கொல்லம் அரசு மருத்துவமனையில் சேர்த்தனர். போலீசார் நடத்திய விசாரணையில் இவர் சபரிமலையில் காணாமல் போன கருணாநிதி என்பதை உறுதி செய்தனர்.உடல் நலம் சரியானதை தொடர்ந்து ரான்னி கோர்ட்டில் ஆஜர் படுத்தப்பட்ட கருணாநிதியை உறவினர்களுடன் போலீசார் அனுப்பி வைத்தனர்.