உத்தராகண்ட்; உத்தராகண்ட் மதரஸா பாடதிட்டத்தில் ராமாயண கதைகளை சேர்க்க முடிவு செய்யப்பட்டுள்ளதாக தகவல் வெளியாகி உள்ளது.

மதரஸா எனப்படும் முஸ்லிம்களுக்கான கல்வி நிறுவனங்கள் வழக்கமான பாடதிட்டங்களுடன் இஸ்லாம் மதம் பற்றி கற்பிக்கப்படுகிறது. இதில் உத்தராகண்ட் மாநிலத்தில் உள்ள 117 மதரஸாக்களின் பாடதிட்டத்தில் ராமாயண கதைகளை சேர்க்க முடிவு செய்யப்பட்டுள்ளதாக கூறப்படுகிறது. முதலில் டேராடூன், ஹரித்வார், நைனிடால், உதம் சிங் நகரில் உள்ள மதரஸாக்களில் வரும் கல்வி ஆண்டு முதல் ராமாயண கதைகள் தொடர்பான புதிய பாடதிட்டம் அறிமுகம் செய்யப்பட உள்ளது.

இதுகுறித்து உத்தராகண்ட் வக்பு வாரிய தலைவர் கூறும்போது; இந்திய கலாச்சாரம் மற்றும் உண்மையான மதிப்புகளை எடுத்துரைக்கும் காவியம் ராமாயணம் ஆகும். இந்திய கலாச்சாரத்தின் அடிப்படையாக விளங்கும் ராமரின் குணநலன்கள் குறித்து மாணவர்களுக்கு கற்பிக்க உள்ளோம். வக்பு வாரியத்தின் கீழ் இயங்கும் 117 மதரஸாக்களிலும் சமஸ்கிருத  மொழியுடன் ராமாயணம் குறித்த பாடங்களை கற்பிக்க உள்ளோம். அப்போது தான் மாணவர்கள் தங்கள் கலாச்சாரத்துடன் இணைய முடியும். இது நமது பாரம்பரியத்தை நிலை நிறுத்தவும், அடுத்த தலைமுறைக்கு கொண்டு செல்லவும் முடியும் என்றார் வக்பு வாரிய தலைவர் ஷதாப் ஷாம்ஸ்.