அவிநாசி; அவிநாசி லிங்கேஸ்வரர் கோவிலில் கும்பாபிஷேகத்தை முன்னிட்டு 48 நாட்கள் மண்டல பூஜைகள் துவங்கியது.அவிநாசியப்பர் பக்தர்கள் குழு சார்பில் அன்னதானம் வழங்கப்பட உள்ளது.

அவிநாசி லிங்கேஸ்வரர் கோவிலில் கடந்த இரண்டாம் தேதி மகா கும்பாபிஷேகம் நடைபெற்றது அதனைத் தொடர்ந்து நேற்று முன்தினம் முதல் மண்டல பூஜைகள் நடைபெற துவங்கியது. இதனையடுத்து, மூன்றாம் தேதி முதல் துவங்கிய மண்டல பூஜைகளில், நாள்தோறும் அபிஷேகம், அலங்கார தீபாராதனைகளும் நடைபெறுகின்றது. தொடர்ந்து 48 நாட்கள் மண்டல பூஜை தினம்தோறும் காலை 10 மணி முதல் 12.00 மணி வரை நடைபெறுகிறது. இதில் ஒரு கட்டளைதாரர் ரூ.20000 ஹிந்து சமய அறநிலைத்துறை அலுவலகத்தில் செலுத்தி கலந்து கொள்ளலாம் என கோவில் நிர்வாகத்தினர் தெரிவித்தனர்.

மண்டல பூஜைகள் முறைகள் குறித்து சிவாச்சாரியார் சிவக்குமார் குருக்கள் கூறும்போது; கும்பாபிஷேகம் நடைபெற்ற அவிநாசி லிங்கேஸ்வரர் கோவிலில் மூன்றாம் தேதியிலிருந்து முதல் 12 நாட்களுக்கு அதிகாலை 5 மணி முதல் இரவு 8.30 மணி வரை கோவில் நடை திறந்திருக்கும். தற்போது, பக்தர்கள் கூட்டம் காரணமாக அர்ச்சனைகள் எதுவும் செய்யாமல் தீபாராதனைகள் மட்டும் நடைபெறுகின்றது. கும்பாபிஷேக பணிகள், அதன் பின்னர் ஒரு வார காலமாக யாகசாலை பூஜைகளில் சிவாச்சாரியார்கள் கலந்து கொண்டது என தொடர்ந்து பணிகளில் சிவாச்சாரியார்கள் ஈடுபட்டு வருகின்றனர். அவர்கள் நலனையும் கருத்தில் கொண்டு கோவில் நடை திறக்கப்படும் கால நேரம் மற்றும் பூஜைகள் முடிவு செய்யப்படும் என்றார்.