கண்ணப்ப நாயனார் சிவனுக்கு கண்கொடுத்த தலம் காளஹஸ்தி. இங்குள்ள சுவாமி காளத்திநாதர். இவரது கண்ணில் ரத்தம் வழிந்ததைக் கண்ட கண்ணப்பர், தன் வலது கண்ணை அகழ்ந்து அப்பினார். பின் இடக்கண்ணிலும் ரத்தம் வழிந்தது. கண்ணப்பர் தன் இடது கண்ணையும் அகழ்ந்து எடுக்க முயற்சித்தார். ஆனால் சிவலிங்கத்தின் இடப்பாகத்தில் இருந்து ஒரு கை முளைத்து எழுந்தது. ‘நில்லு கண்ணப்பா’ என்று அசரீரி ஒலித்து அவரைத் தடுத்தது. இடக்கை அவரைத் தடுக்க காரணம் உண்டு. சிவனின் இடப்பாகம் அம்பிகைக்கு உரியது. தன் மகனைப் போன்ற கண்ணப்பன் துன்பப்படுவதைக் காண தாயின் மனம் பொறுக்கவில்லை. அதனால் அவரைத் தடுத்து அருள் செய்தாள். முக்கண்ணர் என சிவனைக் குறிப்பிட்டாலும் காளஹஸ்தியில் உள்ள சிவனுக்கு உரியது அரைக்கண் மட்டுமே. சிவனின் உடலில் சரி பாதி பார்வதி என்பதால், ஒன்றரைக்கண் அம்மனுக்கு உரியது. காளத்திநாதரின் வலது கண்ணோ கண்ணப்பரிடம் பெற்றது. அதனால் நெற்றிக்கண்ணின் வலதுபகுதி மட்டுமே சிவனுக்குரியது.