காஞ்சிபுரம்:காஞ்சிபுரம் ஏகாம்பரநாதர் சன்னிதி தெருவில் உள்ள சந்தவெளியம்மன் கோவிலில், நேற்று முன்தினம் சித்திரை பெருவிழா துவங்கியது. மதியம் 12:00 மணிக்கு அம்மனுக்கு சிறப்பு அபிஷேகமும், கொல்லுார் தாய் மூகாம்பிகை அலங்காரமும் நடந்தது.

இரண்டாம் நாள் உற்சவமான நேற்று இரவு 7:00 மணிக்கு காஞ்சி பாலா குழுவினரின் 108 திருவிளக்கு பூஜையும், சந்தவெளியம்மனுக்கு கர்ப்பரக்ஷாம்பிகை அலங்காரத்தில் பக்தர்களுக்கு அருள்பாலித்தார். மூன்றாம் நாள் உற்சமான நாளை இரவு 7:00 மணக்கு சந்தவெளி அம்மனுக்கு விஷ்ணு துர்க்கை அலங்காரம் நடக்கிறது. தொடர்ந்து, பரதலாயாவின் பரதநாட்டிய நிகழ்ச்சி நடக்கிறது. நான்காம் நாள் உற்சமான வரும் 19ம் தேதி காலை 7:00 மணிக்கு, 108 பால்குடங்களுடன் பூங்கரகம் புறப்பாடும், மதியம் 12:00 மணிக்கு மஹா அபிஷேகமும், அம்மன் வர்ணிப்பும் நடக்கிறது. மதியம் 1:00 மணிக்கு கூழ்வார்த்தலும், அன்னதானமும், மாலை 3:00 மணிக்கு ஊரணி பொங்கல் வைத்து அம்மனுக்கு படையலிடப்படுகிறது. இரவு 7:30 மணிக்கு மலர், மின் அலங்காரத்தில் எழுந்தருளும் சந்தவெளியம்மன் முக்கிய வீதி வழியாக உலா வருகிறார். இரவு 10:00 மணிக்கு கும்பம் படையலிடப்படுகிறது. விழா நிறைவு நாளான 21ம் தேதி மதியம் 12:00 மணிக்கு உற்சவ சாந்தி அபிஷேகமும், மாலை 6:00 மணிக்கு சந்தவெளியம்மனுக்கு சாந்தசொரூபிணி அலங்காரமும், இரவு 7:00 மணிக்கு மஹாதீபாராதனையை தொடர்ந்து, பக்தர்களுக்கு பிரசாதம் வழங்கப்பட உள்ளது. விழாவிற்கான ஏற்பாட்டை விழாக்குழுவினர், ஏகாம்பரநாதர் சன்னிதி தெருவினர் மற்றும் இளைஞர் அணி நண்பர்கள் செய்து வருகின்றனர்.