பரமக்குடி; பரமக்குடி சுந்தரராஜ பெருமாள் கோயிலில் ஆடி பிரம்மோற்சவ விழா கொடியேற்றத்துடன் துவங்கியது.

பரமக்குடி சவராஷ்டிரா பிராமண மகாஜனங்களுக்கு சொந்தமான சுந்தரராஜ பெருமாள் தேவஸ்தானத்தை சேர்ந்த சவுந்தரவல்லி தாயார், சுந்தரராஜ பெருமாள் கோயில் உள்ளது. இங்கு வருடம் முழுவதும் மதுரை அழகர் கோயிலுக்கு இணையாக விழாக்கள் நடப்பது வழக்கம். தொடர்ந்து இன்று காலை 10:00 மணிக்கு கருட கொடி வீதி வலம் வந்து, ஸ்ரீதேவி, பூதேவி தாயருடன் பெருமாள், கொடி மரத்தின் அருகில் எழுந்தருளினார். மேளதாளம் முழங்க கருட கொடி ஏற்றி வைக்கப்பட்டது. தொடர்ந்து அபிஷேகங்கள் நிறைவடைந்து பிரசாதங்கள் வழங்கப்பட்டன. இரவு 8:00 மணிக்கு பெருமாள் மோகினி அவதாரத்தில் அன்ன வாகனத்தில் வீதி உலா வந்தார். இதே போல் தினமும் காலை, மாலை சிம்மாசனம், சிம்ம, சேஷ, அனுமன், கருட வாகனங்களில் பெருமாள் பல்வேறு அலங்காரங்களில் வீதி உலா வருகிறார். ஜூலை 18 இரவு ஆண்டாள், பெருமாள் மாலை மாற்றல் நிகழ்ச்சி, வீதி உலாவும் நடக்கிறது. ஜூலை 20 காலை நவநீதகிருஷ்ணன் அலங்காரம், இரவு வைகை ஆற்றில் குதிரை வாகனத்தில் பெருமாள் அருள் பாலிக்கிறார். ஜூலை 21 காலை 9:00 மணி தொடங்கி ரத வீதிகளில் ஆடி தேரோட்டம் நடக்க உள்ளது. ஜூலை 22 காலை தீர்த்தவாரியும் மற்றும் இரவு கொடி இறக்கத்துடன் விழா நிறைவடையும். ஏற்பாடுகளை சுந்தரராஜ பெருமாள் தேவஸ்தான டிரஸ்ட்டிகள் செய்துள்ளனர்.