திருப்புவனம்; திருப்புவனம் அருகே பிரசித்தி பெற்ற மடப்புரம் பத்ரகாளியம்மன் கோயிலில் ஆடி மாதம் பிறக்க உள்ளதையடுத்து பக்தர்கள் பாதுகாப்பாக தரினசம் செய்ய முன்னேற்பாடுகளில் இந்து சமய அறநிலையத்துறை அதிகாரிகள் ஈடுபட்டுள்ளனர்.

தமிழகத்தில் பிரசித்தி பெற்ற காளி கோயில்களில் திருப்புவனம் அருகே மடப்புரம் பத்ரகாளியம்மன் கோயிலும் ஒன்று, இந்து சமய அறநிலையத்துறை கட்டுப்பாட்டின் கீழ் செயல்படும் இக்கோயிலுக்கு தினசரி ஆயிரக்கணக்கான பக்தர்கள் வந்து செல்கின்றனர். ஆடி மாதங்களில் பக்தர்களின் எண்ணிக்கை பன்மடங்கு உயரும், தமிழகத்தின் பல்வேறு பகுதிகளில் இருந்தும் அம்மனை தரிசிக்க பக்தர்கள் வந்த வண்ணம் இருப்பார்கள், 10 ஆயிரத்திற்கும் மேற்பட்ட பக்தர்கள் வந்து செல்ல உள்ள நிலையில் பக்தர்கள் பாதுகாப்பாக அம்மனை தரிசனம் செய்ய கோயில் உள்ளேயும், வெளியேயும் சவுக்கு கம்புகளால் தடுப்புகள் அமைக்கப்பட்டு வருகின்றனர். தடுப்புகளினுள் தரிசனத்திற்காக காத்து நிற்கும் பக்தர்களின் வசதிக்காக ஆங்காங்கே பாதுகாக்கப்பட்ட குடிநீர் தொட்டிகளும் ஏற்படுத்தப்பட்டுள்ளன. முதியோர்கள், மாற்றுத்திறனாளிகள் உள்ளிட்டோர் வரிசையில் நிற்காமல் உடனுக்குடன் தரிசனம் செய்ய தனி வரிசை ஏற்படுத்தப்பட்டுள்ளது. ஆடி மாதம் வரும் பக்தர்கள் அம்மனுக்கு காணிக்கை செலுத்த வசதியாக ஆங்காங்கே தற்காலிக உண்டியலும் அமைக்கப்பட்டுள்ளது. ஆடி வெள்ளிக்கிழமைகளில் கூடுதல் போலீசாரும் பாதுகாப்பு பணியில் ஈடுபட உள்ளனர். பக்தர்களின் வாகனங்கள் வடகரை விலக்கு அருகிலேயே நிறுத்த ஏற்பாடுகள் செய்யப்பட்டு வருகின்றன. பக்தர்கள் சிரமமின்றி தரிசனம் செய்யப்பட்டு வரும் முன்னேற்பாடுகளை செயல் அலுவலர் ஞானசேகரன் ஆய்வு செய்ததுடன் கூடுதல் பாதுகாப்பு ஏற்பாடுகள் செய்யவும் உத்தரவிட்டுள்ளார்.