பல்லடம்; பல்லடம் அருகே, வெங்கிட்டாபுரம் ஸ்ரீபிரத்யங்கிரா தேவி கோவிலில், நவராத்திரி விழாவை முன்னிட்டு சிறப்பு யாகம் நடந்தது.

பல்லடம் அடுத்த, வெங்கிட்டாபுரம் அதர்வண பத்ரகாளி பீடத்தில், 16 அடி உயரத்துடன் ஸ்ரீபிரத்தியங்கரா தேவி மூலவராக அருள்பாலிக்கிறார். அக்., 3ம் முதல், இங்கு நவராத்திரி விழா துவங்கி நடந்து வருகிறது. முன்னதாக, அக்., 3ம் தேதி, விக்னேஸ்வர பூஜை, கோ பூஜை, கலச பூஜை, ஸ்ரீ தக்ஷிண காளி மூல மந்திர வேள்வி மற்றும் சிறப்பு யாகங்களுடன் விழா துவங்கியது. தொடர்ந்து, தினசரி, ஜெய துர்கா, தாராதேவி, திரிபுர சுந்தரி, புவனேஸ்வரி உள்ளிட்ட தேவதைகளுக்கான ஹோமங்கள் நடந்தன. அக்., 12 வரை தினசரி சிறப்பு பூஜைகள், வழிபாடுகள் நடக்க உள்ளன. இவ்விழாவின் போது, தினசரி, 10 சுமங்கலியருக்கு புடவை, மஞ்சள், குங்குமம், வளையல் உள்ளிட்டவை வழங்கப்படுகின்றன. அபிஷேக ஆராதனைகளை தொடர்ந்து, சிறப்பு அலங்காரத்தில் ஸ்ரீபிரத்தியங்கிரா தேவி பக்தர்களுக்கு அருள்பாலித்தார்.