சபரிமலை; சபரிமலை நடப்பு மண்டல காலத்தில் வருகை தந்த பக்தர்களின் எண்ணிக்கை கால்கோடியை கடந்துள்ளது. மண்டல பூஜைக்கான ஏற்பாடுகள் சபரிமலையில் தீவிரமாக நடைபெற்று வருகிறது.

கடந்த நவம்பர் 16 அதிகாலையில் தொடங்கிய இந்த ஆண்டுக்கான மண்டல காலம் அதிக அளவிலான புகார்களுக்கு இடம் கொடுக்காமல் சிறப்பாக நடைபெற்று வருகிறது. கடந்த ஆண்டு போல் பக்தர்கள் நீண்ட நேரம் காத்திருக்காமல் தரிசனம் நடத்தி திரும்பினர். பிரசாதத்துக்கு தட்டுப்பாடு ஏற்படவில்லை. தொடர்ச்சியாக கடந்த மூன்று நாட்கள் பக்தர்கள் கூட்டம் அதிக அளவில் காணப்பட்டது .தினசரி 92 ஆயிரத்துக்கும் மேற்பட்ட பக்தர்கள் தரிசனம் நடத்தினர். இதனால் சில மணி நேரம் காத்திருக்க வேண்டிய நிலை ஏற்பட்டது. சரங்குத்தியில் இருந்து பக்தர்கள் கட்டம் கட்டமாக அனுப்பப்பட்டனர். கடந்த 18 இரவு 10:00வரை உள்ள கணக்கின்படி 26 லட்சத்து 8,349 பேர் தரிசனம் நடத்தியுள்ளனர். இது நேற்று 27 லட்சத்தை கடந்தது.

மண்டல பூஜைக்கு இன்னும் ஆறு நாட்கள் மட்டுமே உள்ள நிலையில் சபரிமலையில் அதற்கான ஏற்பாடுகள் தீவிரமடைந்துள்ளது. வரும் 22 காலை 6:00 மணிக்கு ஆரன்முளா பார்த்தசாரதி கோயிலில் இருந்து தங்க அங்கி பவனி புறப்பட்டு 25 மதியம் பம்பை வந்தடைகிறது. இங்கு கணபதி கோவில் அருகே பக்தர்களின் தரிசனத்திற்காக வைக்கப்படும் தங்க அங்கி பின்னர் தலை சுமடாக சன்னிதானம் கொண்டுவரப்படும். அன்று மாலை 6:30 மணிக்கு தங்க அங்கி அணிவித்து தீபாராதனை நடைபெறும். 26 -ல் மண்டல பூஜை நடைபெறுகிறது. அன்று அதிகாலை 3:30 க்கு தொடங்கும் நெய்யபிஷேகம் காலை 11:00 மணியுடன் நிறைவுறும். மதியம் 12:00 - க்கு தங்க அங்கி அணிவித்து மண்டல பூஜை நடைபெறும். அதைத்தொடர்ந்து நடை அடைக்கப்படும். தொடர்ந்து மாலை 4:00 க்கு நடை திறந்து பக்தர்கள் கூட்டத்திற்கு ஏற்ப இரவு 10:00 அல்லது 11:00 க்கு நடை அடைக்கப்படும் என்று தெரிவிக்கப்பட்டுள்ளது. அதன்பின்னர் மகர விளக்கு கால பூஜைகளுக்காக 30 மாலை 5:00 மணிக்கு மீண்டும் நடை திறக்கும்.