தஞ்சாவூர்; திருவையாறு ஐயாரப்பர் கோயில் கும்பாபிஷேகம், 12 ஆண்டுகளுக்குப் பிறகு வெகு சிறப்பாக நடைபெற்றது. ஆயிரக்கணக்கான பக்தர்கள் சுவாமி தரிசனம் செய்தனர்.

தஞ்சாவூர் மாவட்டம் திருவையாறில் ஸ்ரீ அறம் வளர்த்த நாயகி சமேத ஐயாறப்பர் ஆலயம் அமைந்துள்ளது. தருமபுரம் ஆதீனத்திற்கு சொந்தமான இந்த கோவில் பெரிய கோவில் கட்டுவதற்கு முன்பு சுமார் 2000 ஆண்டுகள் பழமையானது. அப்பருக்கு கயிலை காட்சி அளித்த இக்கோவிலில் 12 ஆண்டுகளுக்கு பிறகு குடமுழுக்கு விழா இன்று வெகு விமர்சையாக நடைபெற்றது. கடந்த 29ஆம் தேதி முதல் யாகசாலை பூஜைகள் தொடங்கி தினமும் காலை மாலை என யாகசாலை பூஜைகள் நடைபெற்றன, இதனையடுத்து இன்று எட்டாம் கால பூஜைகள் நிறைவு பெற்று மங்கல வாத்தியங்கள் முழங்க கடம் புறப்பாடு நடைபெற்றது. அதனை தொடர்ந்து விமான கோபுர கலசங்களுக்கு சிவாச்சாரியார்கள் புனித நீர் ஊற்றி குடமுழுக்கு விழா விமர்சையாக நடைபெற்றது. இதில் சுற்றுவட்டார பகுதிகளை சேர்ந்த ஆயிரத்திற்கும் மேற்பட்ட பொதுமக்கள், பக்தர்கள் கலந்து கொண்டு கோபுர தரிசனம் செய்தனர்.  பிரசித்தி பெற்ற ஸ்ரீ ஐயாறப்பர் ஆலயத்தில்  குடமுழுக்கு விழா வெகு விமர்சையாக நடைபெற்றது.