தஞ்சாவூர்; தமிழ் கடவுள் என போற்றப்படும் முருகனின் அறுபடை வீடுகளில் நான்காம் படை வீடாக அமையப்பெற்றது கும்பகோணம் அருகேயுள்ள சுவாமிமலை சுவாமிநாத சுவாமி திருக்கோவில். பிரபவ முதல் அட்சய முடியவுள்ள 60 தமிழ் வருட தேவதைகள் 60 படிக்கட்டுகளாக அமையப்பெற்ற மலைக்கோயிலாகும். தந்தைக்கு ஓம் எனும் பிரணவ மந்திர பொருளை குருவாக இருந்து உபதேசித்த பெருமை பெற்றது இத்தலம். இத்தலத்தில் முருகப்பெருமான், சிவகுருநாதன் என்றும், சுவாமிநாதன் என்றும் போற்றப்படுகிறார்.

இத்தகைய சிறப்பு பெற்ற இக்கோவிலில் ஒவ்வொரு ஆண்டும் தைப்பூசத்திருவிழா சிறப்பாக பத்து நாட்களுக்கு நடைபெறுவது வழக்கம். அதுபோல இவ்வாண்டும் கடந்த ஜனவரி 2ம் தேதி உற்சவர் வள்ளி, தேவசேனா சமேத சுப்பிரமணியசுவாமி விசேஷ மலர் அலங்காரத்தில் தங்க கொடிமரம் அருகே எழுந்தருள, வேலுடன் யானை உருவப்படம் பொறிக்கப்பட்ட திருக்கொடியேற்றத்துடன் விழா தொடங்கியது. இதனைத்தொடர்ந்து தைப்பூச திருவிழாவையொட்டி நாள்தோறும் காலையும், மாலையும் படிச்சட்டத்தில் சுவாமி திருவீதியுலா நடைபெற்றது. விழாவின் முக்கிய நிகழ்ச்சியாக 10ம் நாள் தைப்பூச தினமான இன்று  அதிகாலை முதல் பல்லாயிரக்கணக்கான பக்தர்கள் நீண்ட வரிசையில் நின்று சுவாமி தரிசனம் செய்து வருகின்றனர். தொடர்ந்து காலை 11 மணிக்கு வெள்ளி மயில் வாகனத்தில் சுவாமி திருவீதியுலா நடைபெற்று, காவிரியாற்றில் தீர்த்தவாரி வைபவமும் நடைபெற்றது. நிறைவாக நாளை  இரவு யதாஸ்தானம் சேர்தலுடன் இவ்வாண்டிற்கான தைப்பூசத்திருவிழா இனிதே நிறைவு பெறுகிறது.