காஞ்சிபுரம்: காஞ்சிபுரம் வைகுண்ட பெருமாள் கோவில் திருப்பணியை விரைந்து முடித்து கும்பாபிஷேகம் நடத்த வேண்டும் என, பக்தர்கள் வலியுறுத்தி வரு கின்றனர். காஞ்சிபுரம் வைகுண்ட பெருமாள் கோவில், பரமேஸ்வர விண்ணகரம் என அழைக்கப்படுகிறது. தொல்லியல் துறை பராமரிப்பில் உள்ள இக்கோவில் கும்பாபிஷேகம் கடைசியாக 2007ல் நடந்தது.

இந்நிலையில் கோவில் கோபுரம் பொலிவிழந்த நிலையில் இருந்தது. எனவே, கோபுரத்தை பழமை மாறாமல் புதுப்பிக்க தொல்லியல் துறை முடிவு செய்தது. திருப்பணி துவங்க உள்ளதையொட்டி, கடந்த ஆண்டு அக்., 21ம் தேதி கோவிலில் பாலாலயம் நடந்தது. இதையடுத்து, தொல்லியல் துறையின், ரசாயண பொறியாளர் பிரிவு வாயிலாக கோவில் கோபுரங்களில் படிந்திருந்த பாசி மற்றும் துாசுகளை அகற்றி, பழமை மாறாமால் புதுப்பிப்பது என, தொல்லியல் துறையினர் மேற்கொள்ள வேண்டிய திருப்பணிகள் நிறைவு பெற்றுள்ளன.

ஹிந்து சமய அறநிலையத் துறையினர் மேற்கொள்ள வேண்டிய கொடி மரம், மண்டபம், மடப்பள்ளி உள்ளிட்ட திருப்பணியை விரைந்து முடித்து கும்பாபிஷேகம் நடத்த வேண்டும் என, பக்தர்கள் வலியுறுத்தி வருகின்றனர். 

இதுகுறித்து காஞ்சிபுரம் ஹிந்து சமய அறநிலையத்துறை அதிகாரி ஒருவர் கூறியதாவது: காஞ்சிபுரம் வைகு ண்ட பெருமாள் கோவிலிலில் ஹிந்து சமய அறநிலையத் துறை சார்பில், மேற்கொள்ள வேண்டிய திருப்பணிகள் நடந்து வருகின்றன. இப்பணிகள் விரைந்து முடிக்கப்பட்டு 2026ம் ஆண்டு ஜன., அல்லது பிப்., மாதம் கும்பாபிஷேகம் நடத்தப்படும்.

இவ்வாறு அவர் கூறினார்.