பெ.நா.பாளையம்: பெரியநாயக்கன்பாளையம் அருகே உள்ள ஜோதிபுரம் தண்டு மாரியம்மன் கோயிலில் நாளை சக்தி அழைத்தல் நிகழ்ச்சி நடக்கிறது.

கோவை மேட்டுப்பாளையம் ரோட்டில் பெரியநாயக்கன்பாளையம் அருகே ஜோதிபுரத்தில் தண்டு மாரியம்மன் கோயில் உள்ளது. இங்கு கடந்த, 14ம் தேதி விக்னேஸ்வரர் பூஜையுடன் விழா துவங்கியது. அன்று இரவு பூச்சாட்டு விழா நடந்தது. 21ம் தேதி இரவு, 10:00 மணிக்கு பூ கம்பம் போடுதல் நிகழ்ச்சியும், 22ம் தேதி முதல், 26 வரை பூவோடு எடுத்தல் நிகழ்ச்சியும் நடந்தது. இன்று திருக்கல்யாணம் நிகழ்ச்சியும் நாளை செவ்வாய்க்கிழமை இரவு, 7:30 மணிக்கு சக்தி அழைத்தல் நிகழ்ச்சி நடக்கிறது. 29ம் தேதி காலை, 6:00 மணிக்கு சக்தி கரகம் கோயில் வந்தடைதல், தொடர்ந்து, அலங்கார பூஜை, பொங்கல், மா விளக்கு, அக்னி கரகம் நிகழ்ச்சி நடக்கிறது. இரவு, 12:00 மணிக்கு பூ கம்பம் அகற்றுதல் நடக்கிறது. 30ம் தேதி வியாழக்கிழமை மஞ்சள் நீர் விழாவும், மே 1ம் தேதி வெள்ளிக்கிழமை காலை, 8:00 மணிக்கு வசந்த பூஜையுடன் விழா நிறைவடைகிறது. நிகழ்ச்சி ஏற்பாடுகளை தண்டு மாரியம்மன் ஆராதனை மற்றும் வழிபாட்டு அறக்கட்டளை மற்றும் கட்டளைதாரர்கள் செய்து வருகின்றனர்.