புதுச்சேரி: புதுச்சேரி கம்பன் கலையரங்கத்தில், நேற்று முன்தினம் துவங்கிய கம்பன் விழா இன்று நிறைவு பெறுகிறது.

விழாவின், 2ம் நாளான நேற்று காலை 9 மணிக்கு கம்பன் போற்றும் (வாய்மை, கடமை வீரம்) எனும் தலைப்பில் இளையோர் அரங்கம் நடந்தது. காலை 10:15 மணிக்கு மாற்றுத்திறன் மாணவர்களுக்கு பரிசு வழங்கப்பட்டது. 10:45 மணிக்கு ‘ராமன் சுக்ரீவனுக்கு வரம் கொடுத்தது குற்றம்’ என்ற தலைப்பில் வழக்காடு மன்றம் நடந்தது. இதில் நடுவராக இலங்கை ஜெயராஜ் பங்கேற்றார்.

பேராசிரியர் சச்சிதானந்தம் முன்னிலை வகித்தார். வழக்கை தொடுப்பவராக பர்வீன் சுல்தானா, மறுப்பவராக சண்முக வடிவேல் பங்கேற்று பேசினர். மாலை 5 மணிக்கு ‘கம்பன் கண்ட மாண்பு’ என்ற கவியரங்கம் நடந்தது. 6:30 மணிக்கு சப்தகிரி சிவக்கொழுந்து, ராமலிங்கம் சகோதரர்கள் அறக்கட்டளை சார்பில் ‘காவியம் போற்றும் மேன்மை’ பட்டிமன்றம் நடந்தது. இதில் சப்தகிரி ராமலிங்கம் தலைமை தாங்கினார்.

நிறைவு நாளான இன்று காலை 9 மணிக்கு ‘கம்பனில் நான் கண்ட’ என்ற தலைப்பில் சிந்தனை அரங்கம் நடக்கிறது. காலை 11 மணிக்கு நீதிபதி சுரேஷ்குமார் ‘தாழ்ந்தோர் உயர்வர்’ என்ற தலைப்பில் தனியுரையும், மாலை 4:30 மணிக்கு இளம்பிறை மணிமாறனின், காரணம் காரியமும் என்ற தலைப்பில் தனியுரை நடக்கிறது. மாலை 6 மணிக்கு நீதிபதிகள் ராமசுப்ரமணியன், ராமலிங்கம், டி.ஐ.ஜி., சத்தியசுந்தரம் ஆகியோர் நடுவர்களாக பங்கேற்கும் முதல் நாள் தீர்ப்பை எதிர்த்து மேல்முறையீடு நடக்கிறது.

விழாவில், கம்பன் கழகப் போட்டிகளில் வெற்றி பெற்ற மாணவர்களுக்கு பரிசுகள் வழங்கப்படுகிறது. ஏற்பாடுகளை கம்பன் கழக நிர்வாகிகள் செய்து வருகின்றனர்.