திருமலையில் உள்ள வெங்கடேஸ்வர பெருமானுக்கு நடத்தப்படும் பல வருடாந்திர விழாக்களில் ஒன்றான பாக் சவாரி திருவிழா, வியாழக்கிழமை மாலை வெகு விமரிசையாகக் கொண்டாடப்பட்டது.

பெருமானின் வருடாந்திர பிரம்மோற்சவங்கள் நிறைவடைந்த மறுநாளன்று பாக் சவாரி திருவிழாவைக் கொண்டாடுவது வழக்கம். புராணக் கதையின்படி, தனது முதன்மையான பக்தர்களில் ஒருவரான அனந்தாழ்வாரின் பக்தியைச் சோதிப்பதற்காக, பெருமான் ஸ்ரீதேவி தாயாருடன் மனித உருவில் அனந்தாழ்வாரின் பூந்தோட்டத்திற்கு எழுந்தருளுகிறார். அப்போது, ​​தனது தோட்டத்தில் பூக்களைப் பறித்துக்கொண்டிருந்த தாயாரை அனந்தாழ்வார் ஒரு புனிதமான அரச மரத்தில் (அஸ்வத்த விருட்சம்) கட்டிப்போடுகிறார். ஆனால், பெருமானைப் பிடிக்க முயலும்போது, ​​அவர் இடஞ்சுழியாக ஓடி, கோயிலுக்குள் நுழைந்து மறைந்துவிடுகிறார்.

பின்னர், தனது பக்தியைச் சோதிக்க வந்தது பெருமானே என்பதை உணர்ந்த அனந்தாழ்வார் மிகுந்த மனவருத்தம் கொள்கிறார். உடனடியாகத் தாயாரை விடுவித்து, ஒரு பூக்கூடையில் அமர்த்தி, அவரே அவரைப் பெருமானிடம் மீண்டும் அழைத்துச் செல்கிறார். அவரது பக்தியால் மகிழ்ந்த பெருமான், பிரம்மோற்சவங்களுக்குப் பிந்தைய நாளில் கோயிலுக்குத் திரும்புவதற்கு முன் அனந்தாழ்வாரின் தோட்டத்திற்கு எழுந்தருளுவதாக உறுதியளித்து, அவரது விருப்பத்தை நிறைவேற்றுகிறார்.

இப்புராண நிகழ்வை நினைவுகூரும் வகையில் நடத்தப்பட்ட பாக் சவாரி திருவிழா, ஆரம்பம் முதல் இறுதி வரை மிகவும் சிறப்பாக நடைபெற்றது. மாலை 4 மணிக்கு வைபவோற்சவ மண்டபத்திலிருந்து புறப்பட்ட உற்சவ மூர்த்தி, அனந்தாழ்வார் தோட்டத்திற்குச் சென்று அங்கு சிறப்பு வழிபாடுகளை ஏற்றுக்கொண்டு, மீண்டும் கோயிலுக்குத் திரும்பியதோடு இவ்விழா சிறப்பாக நிறைவடைந்தது. முன்னதாக, பாக் சவாரி திருவிழாவின் ஒரு பகுதியாக, ஸ்ரீவாரி கோயிலுக்கு தென்மேற்கே அமைந்துள்ள புருஷைவாரி தோட்டத்தில் அனந்தாழ்வாரின் வழித்தோன்றல்கள் நாலாயிர திவ்யப் பிரபந்தத்தை ஓதினர். இந்நிகழ்ச்சியில் இந்நிகழ்ச்சியில் திருமலை பெறிய ஜீயர் சுவாமி, சின்ன ஜீயர் சுவாமி, தேவஸ்தான நிர்வாக அதிகாரி முத்தடா ரவிச்சந்திரா, கோயில் துணை அதிகாரி பாஸ்கர், பேஷ்கர் ராம கிருஷ்ணா, மற்றம் கோயில் அதிகாரிகள் மற்றும் பக்தர்கள் கலந்து கொண்டனர்.