மதுரை: மதுரை மீனாட்சி அம்மன் கோயிலின் தங்கக் கோபுரத்தை காக்கும் குடும்பத்திற்கு இன்றும் கோயில் சார்பில் பரிவட்டம் மரியாதை செய்யப்படுகிறது.

மீனாட்சி கோயிலின் பல்வேறு பணிகளுக்கு மன்னர் காலம் முதலே மிராசு உரிமைகள் வழங்கப்பட்டு இன்றும் அவர்களது சந்ததியினரால் மேற்கொள்ளப்பட்டு வருகிறது. அப்பணிகளில் குமாரவாசல், முடிவாசல், சிகரம் காவல் பணி குறிப்பிடத்தக்கவை.

அப்பணிகளில் அம்மன் சன்னதி இரண்டாம் பிரகாரம், சுவாமி சன்னதி முதல் பிரகாரம், கோயில் மேல்தளம், அம்மன், சுவாமி தங்க விமானங்களை காவல் காப்பது முக்கியமானது. இதுகுறித்து சீதளப் புத்தகத்தில் குறிப்பிடப்பட்டுள்ளது.

இந்த பணிகளை 20ம் நுாற்றாண்டில் லட்சுமணனும், தற்போது அவரது வாரிசுகள் ராகேஷ் திரவியம், லட்சுமணகுமார், வெங்கட் அவினாஷ், பாலசுப்பிரமணியம், ராஜ்குமார், கணேஷ், கார்த்திகேயன் ஆகியோர் செய்து வருகின்றனர்.

ஒவ்வொரு ஆண்டும் சித்திரைத் திருவிழாவில் தேரோட்டத்தின் போதும், ஆவணி சட்டத்தேர் திருவிழாவின் போதும் இவர்களுக்கு கோயில் பரிவட்டம் மரியாதை அளிக்கப்பட்டு வருகிறது.