இடுக்கி மாவட்டம் வண்டிபெரியாறு அருகில் உள்ள சத்திரம், புல்மேடு பாரம்பரிய காட்டு வழியில் சபரிமலைக்கு செல்லும் பக்தர்களின் எண்ணிக்கை ஆண்டு தோறும் அதிகரித்து வருகிறது. சபரிமலை சீசன் துவங்கிய நிலையில் ஐய்யப்ப பக்தர்களின் வருகையால் சத்திரம் களைகட்ட துவங்கியது. விரிவான ஏற்பாடுகள்: காட்டு வழியில் செல்லும் பக்தர்களுக்கு விரிவான ஏற்பாடுகள் செய்யப்பட்டுள்ளன. அந்த வழியில் முக்கிய மையங்கள், சேவைகள் விவரிக்கும் வகையில் அச்சிடப்பட்ட வழியுடன் கூடிய வரைபடம் வழங்கப்படுகிறது. பக்தர்களின் பாதுகாப்பை உறுதி செய்யும் வகையில் வனம், சுகாதாரம்,போலீஸ், உள்ளாட்சி துறைகள் சார்பில் ஏற்பாடுகள் செய்யப் பட்டுள்ளன. காட்டு வழியில் வனவிலங்குகளின் நடமாட்டம்இல்லை என்பதை உறுதி செய்த பிறகு பக்தர்கள் செல்ல அனுமதிக்கப்படுகின்றனர். பக்தர்களுக்கு உதவ எக்கோ கார்டு கள் வழி நெடுகிலும் பணியில் ஈடுபடுத்தப் பட்டுள்ளனர். ஆபத்தான பகுதிகளில் எச்சரிக்கை பலகை, திசைக்காட்டிகள் வைக்கப்பட்டுள்ளன. சத்திரம்,புல்மேடு,கரிமலை ஆகிய பகுதிகளில் வனத்துறை சார்பில் சேவை மையங்கள் அமைக்கப்பட்டுள்ளன. சத்திரத்தில் தற்காலிக மருந்தகம், நடமாடும் மருத்துவ பிரிவு, புல் மேட்டில் மருத்துவ வசதி செய்யப்பட்டுள்ளது. தகவல் தொடர்பு தடங்கலை தவிர்க்கும் வகையில் சத்திரம் உள்பட காட்டு வழியில் பல்வேறு இடங்களில் வி.எச். எப். வசதி செய்யப்பட்டுள்ளன. சத்திரம் உள்பட குமுளி சுற்றுப்பகுதிகளில் பிளாஸ்டிக் பொருட்கள், பாட்டில்கள் ஆகியவை விற்கவும், பயன்படுத்தவும் ஜன.15 வரை தடை விதிக்கப் பட்டுள்ளது.