ஆண்டிபட்டி: மாவூற்று வேலப்பர் கோயில் வளாத்தில் கருப்ப சுவாமி கோயில் எதிரே நடைபாதையில் இந்த பாறை இயந்திரம் மூலம் உடைத்து அப்புறப்படுத்தப்பட்டது.

மேற்கு தொடர்ச்சி மலை அடிவாரத்தில் உள்ளது மாவூற்று வேலப்பர் கோயில். மருத மரங்களின் வேர் பகுதியில் இருந்து வரும் வற்றாத சுனை கோயிலின் தனிச்சிறப்பு. ஒவ்வொரு ஆண்டும் சித்திரையில் நடைபெறும் விழாவில் ஆயிரக்கணக்கான பக்தர்கள் தேனி மற்றும் வெளி மாவட்டங்களில் இருந்து வந்து செல்வர். அமாவாசை, பௌர்ணமி, கார்த்திகை மற்றும் அரசு விடுமுறை நாட்களிலும் அதிகப்படியான பக்தர்கள் கோயிலுக்கு வந்து செல்கின்றனர். ஆண்டிபட்டியில் இருந்து 21 கி.மீ., தூரத்தில் உள்ள இக்கோவிலுக்கு தினமும் இரு முறை அரசு டவுன் பஸ் இயக்கப்படுகிறது. மலைமேல் உள்ள வேலப்பர் சுவாமி கோயில் வளாகத்தில் சமீபத்தில் உபயதாரர் மூலம் பல லட்சம் செலவில் பல்வேறு வசதிகள் செய்து தரப்பட்டுள்ளன. தற்போது கீழ் பகுதியில் கருப்ப சுவாமி கோயில் எதிரே கரடு முரடான பாதையில் பக்தர்கள் கூட்டமான நேரங்களில் சிரமப்பட்டனர். இதனை கருத்தில் கொண்டு அப்பகுதியில் இருந்த பாறையை அகற்றி புதிய நடைபாதை அமைக்க ஏற்பாடுகள் நடந்து வருகிறது. பக்தர்களின் வசதிக்காக இப் பகுதியில் உபயதாரர் மூலம் ரூ.18.50 லட்சம் மதிப்பில் புதிய நடைபாதை அமைக்க திட்டமிடப்பட்டுள்ளது.இப் பணிகளை இன்னும் சில வாரங்களில் முடிக்க திட்டமிடப்பட்டுள்ளதாக கோயில் நிர்வாகத்தினர் தெரிவித்தனர்.