திருப்புவனம்: திருப்புவனம் அருகே மழை வேண்டி அம்பலத்தாடி கிராமத்தில் புரவி எடுப்பு திருவிழா நடந்தது.

தமிழகத்தில் எல் நினோ தாக்கத்தால் வெயிலின் கொடுமை அதிகரித்த வண்ணம் உள்ளது. வடகிழக்கு பருவமழை தொடங்காத நிலையில் விவசாயிகள் கவலையடைந்துள்ளனர். கிராமங்களில் மழை வேண்டி முளைப்பாரி மற்றும் புரவி எடுப்பு திருவிழா நடத்தப்படுவது வழக்கம். அம்பலத்தாடி ஸ்ரீகூத்தாடி அய்யனார் கோயிலுக்கு புரவி எடுப்பு திருவிழா நடத்தப்பட்டது. நேற்று முன்தினம் மாலை நான்கு மணிக்கு கிராம மக்கள் ஊர்வலமாக தவத்தாரேந்தல் வேளார் குடியிருப்பிற்கு சென்றனர். அங்கு 13 புரவிகள், ஒரு காளை ஆகியவற்றிற்கு புது வேஷ்டி, துண்டுகள், மாலைகள் அணிவிக்கப்பட்டு சிறப்பு பூஜைகள் நடந்தன. அங்கிருந்து ஊர்வலமாக மேளதாளங்களுடன் அம்பலத்தாடி ஸ்ரீகூத்தாடி அய்யனார் கோயிலுக்கு வந்தனர். திருமணம் தடை நீங்க இளைஞர்கள் நேர்த்திகடன் விரதமிருந்து புரவிகளை சுமந்து வந்தனர். இரவு அம்பலத்தாடி நாடக மேடையில் ஸ்ரீவள்ளி திருமணம் நாடகம் நடந்தது. விழாவிற்கான ஏற்பாடுகளை கிராம மக்கள் செய்திருந்தனர்.