அகமதாபாத்: உஜ்ஜைனிலுள்ள மகரிஷி சந்தீபனி ராஷ்ட்ரிய வேத வித்யா பிரதிஷ்டான் மற்றும் அகமதாபாத்திலுள்ள சஸ்து சாகித்ய முத்ராலய அறக்கட்டளை ஆகியவற்றின் கூட்டு முயற்சியால், வேதங்கள், சமஸ்கிருதம் மற்றும் இந்தியாவின் பாரம்பரிய மரபு குறித்த விழிப்புணர்வை ஏற்படுத்தும் நோக்கில் வேத ஞான சப்தா என்ற ஒரு வார கால நிகழ்ச்சி அகமதாபாத்தில் செப்டம்பர் 27 முதல் அக்டோபர் 3 வரை நடத்தப்பட்டது.

இந்நிகழ்ச்சி அகமதாபாத் மற்றும் காந்திநகர் முழுவதும் உள்ள ஏழு வெவ்வேறு இடங்களில் சமஸ்கிருத அறிஞர்கள், கல்வியாளர்கள், எழுத்தாளர்கள் மற்றும் கல்வி நிறுவனங்களின் பிரதிநிதிகள் பங்கேற்றனர். வேத ஞான சப்தாவின் மிக முக்கியமான நிகழ்வு ஒன்று, அகமதாபாத்தில் உள்ள ஸ்ரீ காஞ்சி காமகோடி பீடம் கல்வி அறக்கட்டளையின் வளாகத்தில் மாலை 4:30 மணி முதல் 6 மணி வரை நடைபெற்றது. கோத்ராவில் உள்ள கோவிந்த் குரு பல்கலைக்கழகத்தின் சமஸ்கிருதத் துறைத் தலைவர் பேராசிரியர் பாவ்பிரகாஷ் காந்தி சிறப்புரையாற்றினார். யஜுர்வேதம் - அதன் பொருள், சிறப்பு மற்றும் முக்கியத்துவம் குறித்து அவரது உரை அமைந்திருந்தது; இது காஞ்சி வளாகத்தைச் சேர்ந்த மாணவர்கள் மற்றும் பங்கேற்பாளர்களுக்கு வேத அறிவு மற்றும் மரபுடன் தொடர்பு கொள்ளும் வாய்ப்பை வழங்கியது. தேசிய அளவிலான வேத அறிவு சார்ந்த ஒரு முன்னெடுப்பை, ஸ்ரீ காஞ்சி காமகோடி பீடத்தின் கீழ் இயங்கும் ஒரு கல்வி நிறுவனத்திற்கே நேரடியாகக் கொண்டு வந்ததால், இந்நிகழ்ச்சியில் பங்கேற்பு மிகவும் குறிப்பிடத்தக்கதாக அமைந்தது. சமஸ்கிருதம், வேதக் கல்வி மற்றும் இந்தியாவின் பாரம்பரிய அறிவு அமைப்புகளை முன்னிறுத்துவதில் அந்த அறக்கட்டளை தொடர்ந்து அளித்து வரும் முக்கியத்துவத்திற்கும் இது வலுசேர்ப்பதாக அமைந்தது. ஏழு நாட்களும் அமர்வுகளைத் தொடங்கி வைக்கும் விதமாக அகமதாபாத்தின் கோட்டா பகுதியில் உள்ள ஸ்ரீ சங்கர விஜயேந்திர சரஸ்வதி சம்ஸ்கிருதி ஹஸ்த வித்யா ஏவம் கலா பாடசாலையின் மாணவர்கள் அழைக்கப்பட்டனர். வழக்கமான கல்வி மற்றும் சமஸ்கிருத மொழியுடன் வேத அனுஷ்டானங்களையும் ஒருங்கிணைத்துச் செயல்படும் ஒரு பாடசாலையில் பயிலும் அந்த மாணவர்கள் பெரிதும் பாராட்டப்பட்டனர்.