புதுச்சேரி: கருவடிக்குப்பம் மெயின் ரோட்டில், சென்னை ராமகிருஷ்ண மடத்தின், புதுச்சேரி கிளை திறப்பு விழா நாளை 10ம் தேதி நடக்கிறது.

இதையொட்டி, இன்று மதியம் ஸ்ரீஜயேந்திர சரஸ்வதி வேத பாடசாலையின் ஆனந்த நாராயண சாஸ்திரிகள் மற்றும் அவரது குழுவினர் மூலம் கணபதி ஹோமம், வாஸ்து ஹோமம், நவக்கிரக பூஜை நடந்தது. அதில், கவர்னர் கைலாஷ்நாதன், பா.ஜ., மாநில தலைவர் ராமலிங்கம் ஆகியோர் பங்கேற்று தரிசனம் செய்தனர். தொடர்ந்து, ராமகிருஷ்ண மடம் மற்றும் மிஷன் தலைவர் சுவாமி கவுதமானந்தஜி மகராஜிடம் ஆசி பெற்றனர். இதில், திரளான பக்தர்கள் கலந்து கொண்டனர்.

தொடர்ந்து, முக்கிய நிகழ்வாக நாளை 10ம் தேதி காலை 7:00 மணிக்கு திருமூவரைப் பிரதிஷ்டை செய்தல், 9:30 மணிக்கு சிறப்பு பூஜை, 10:30 மணிக்கு ஹோமம், 11:30 மணிக்கு ராமகிருஷ்ண மடம் மற்றும் மிஷன் தலைவர் சுவாமி கவுதமானந்தஜி மகராஜ் ஆசியுரை நடக்கிறது. மதியம் 2:00 மணி முதல் கோயம்புத்துார், ராமகிருஷ்ண மிஷன் வித்யாலயத்தின் ஹரிவிரதானந்தர், சென்னை ராமகிருஷ்ண மடத்தின் மூத்த துறவி ஆத்மகனானந்தர், பேலுார் மடம் ராமகிருஷ்ண மிஷன் சாரதா பீடத்தின் செயலாளர் சுகதேவானந்தர், விழுப்புரம் ராமகிருஷ்ண மிஷன் செயலாளர் பரமசுகானந்தர் ஆகியோரின் சொற்பொழிவு நடக்கிறது. மாலை நடக்கும் விழாவில், முதல்வர் ரங்கசாமி தலைமை விருந்தினராக பங்கேற்று ராமகிருஷ்ண மடம், புதுச்சேரி கிளையை திறந்து வைத்து சிறப்புரையாற்றுகிறார்.