பொங்கலூர்: இந்த ஆண்டு கடும் வறட்சி நிலவுகிறது. குடிப்பதற்கு கூட தண்ணீர் இல்லை. இதனால் பொங்கலூர் தங்காய்புதூரில் கிராம பொது மக்கள் ஒன்றிணைந்து வீடு வீடாக சென்று மழை சோறு எடுத்தனர். மழை பெய்ய வேண்டி பிள்ளையார் கோவிலில் வழிபட்டனர். பின் பிள்ளையார் கோவிலில் இருந்து புறப்பட்டு அம்மா சோறு, அம்மா சோறு என்று ஒப்பாரி வைத்துக் கொண்டும், ஊசி போல மின்னல் மின்னி உத்த மழை பெய்யனும்; பாசிபோல மின்னல் மின்னி பலத்த மழை பெய்யனும் என்று பாட்டு பாடிக்கொண்டும் ஊர்வலமாகச் சென்றனர். தண்ணீர் இல்லாத ஊரில் குடியிருக்க மாட்டோம் என்று கோபித்துக் கொண்டு ஊரை விட்டு செல்வதாக கூறி பொங்கலூர் கண்டியன்கோவில் கிராம எல்லையை கடந்து காங்கேயம் படியூர் எல்லைக்குச் சென்றனர். பின் பெரியவர்கள் நல்ல மழை பெய்யும்; நாடு செழிக்கும் என்று அனைவரையும் சமாதானப்படுத்தினர். தாங்கள் கொண்டு சென்ற கூழ், கஞ்சி ஆகியவற்றை அனைவருக்கும் வழங்கினர். அதை அருந்தி விட்டு வீடு திரும்பினர்.