அன்னூர்: அச்சம்பாளையம் செல்வ விநாயகர் கோவில் கும்பாபிஷேகம் இன்று நடக்கிறது. அச்சம்பாளையத்தில் பழமையான செல்வ விநாயகர் கோவில் உள்ளது. இக்கோவிலில் புதிதாக இரண்டு நிலை கொண்ட கோபுரம் கட்டப்பட்டுள்ளது. தன்னாசியப்பர், கல்யாண சுப்பிரமணியர், விஜயநாராயண பெருமாள், நவக்கிரக மூர்த்தி மற்றும் பரிவார தெய்வங்களான தட்சிணாமூர்த்தி, துர்க்கை, ஐயப்பன் ஆலயங்கள் நிர்மாணிக்கப்பட்டு, திருப்பணி செய்யப்பட்டுள்ளது. கும்பாபிஷேக விழா, கடந்த 23ம் தேதி காலை கணபதி ஹோமத்துடன் துவங்கியது. நவகிரக ஹோமம், மகாலட்சுமி ஹோமம், முதற்கால யாக பூஜை நடந்தது. நேற்று காலையில் இரண்டாம் கால யாக பூஜையும், கோபுர கலச பிரதிஷ்டையும் நடந்தது. இன்று (25ம் தேதி) காலை 8.30 மணிக்கு மகா கும்பாபிஷேகம் நடக்கிறது. சிரவை ஆதீனம் குமரகுருபர அடிகள், பேரூர் இளையபட்டம், மருதாசல அடிகள், தொட்டிபாளையம், கருப்பராயர் அடிகள் ஆகியோர் பங்கேற்கின்றனர். அன்னதானம் வழங்கப்படுகிறது.பூஜையின்போது வேத பாராயணம் செய்யப்படுகிறது. ஏற்பாடுகளை ஊர் பொதுமக்கள் செய்து வருகின்றனர்.