குற்றாலம்: குற்றாலம் குற்றாலநாதர் கோயிலில் திருவாதிரை திருவிழா இன்று (9ம் தேதி) கொடியேற்றத்துடன் துவங்குகிறது. குற்றாலம் குற்றாலநாதர், குழல்வாய்மொழி அம்பாள் கோயில் சித்திர சபையில் உள்ள நடராசபெருமானுக்கு நடைபெறும் சிறப்புமிக்க மார்கழி திருவாதிரை திருவிழா இன்று (9ம் தேதி) காலை 5.20 மணிக்கு மேல் 6.20 மணிக்குள் கொடியேற்றத்துடன் திருவிழா துவங்குகிறது. தொடர்ந்து அப்பர் திருவுலா உழவாரப் பணியும் இரவு சுவாமி அம்பாள் வெள்ளி சப்பரத்தில் எழுந்தருளலும் நடக்கிறது. தொடர்ந்து நாளை (10ம் தேதி) காலை, இரவு சுவாமி அம்பாள் வெள்ளிச் சப்பரத்திலும், 11ம்தேதி சுவாமி பூத வாகனத்திலும், அம்பாள் சிம்ம வாகனத்திலும், 12ம்தேதி இரவு சுவாமி வெள்ளி ரிஷப வாகனத்தில் பஞ்சமூர்த்திகள் புறப்பாடும், அம்பாள் வெள்ளி சப்பரத்தில் எழுந்தருளலும் நடக்கிறது. 13ம்தேதி காலை 8.20 மணிக்கு நடராசர் மற்றும் பஞ்சமூர்த்திகள் தேரோட்டம் நடக்கிறது. இரவு சுவாமி பூத வாகனத்திலும், அம்பாள் கிளி வாகனத்திலும் எழுந்தருளுகின்றனர். 14ம்தேதி சுவாமி யானை வாகனத்திலும், அம்பாள் அன்னம் வாகனத்திலும், 15ம்தேதி நடராசர் வெள்ளை சாத்தியும், 16ம்தேதி காலை பச்சை சாத்தி, தாண்டவ தீபாராதனையும் இரவு பூங்கோயில் வாகனத்தில் எழுந்தருளலும் நடக்கிறது. 17ம்தேதி இரவு சுவாமி பூத வாகனத்திலும், அம்பாள் காமதேனு வாகனத்திலும் எழுந்தருளல் நடக்கிறது. 18ம்தேதி அதிகாலை 4 மணிக்கு சித்ர சபையில் நடராசர் ஆருத்ரா தரிசன தாண்ட தீபாராதனையும், 5.20 மணிக்கு திரிகூட மண்டபத்தில் ஆருத்ரா தரிசன தாண்டவ தீபாராதனையும் நடக்கிறது. ஏற்பாடுகளை கோயில் உதவி ஆணையர் கண்ணதாசன், செயல் அலுவலர் வெங்கடேஷ் ஆகியோர் மேற்பார்வையில் கோயில் பணியாளர்கள் செய்து வருகின்றனர்.