மோகனூர்: மோகனூர் மாரியம்மன் கோவிலில், ஏப்ரல், 14ம் தேதி குண்டம் இறங்கும் விழா கோலாகலமாக நடக்கிறது. மோகனூரில், பிரசித்தி பெற்ற மாரியம்மன் கோவில் உள்ளது. இக்கோவிலில், ஆண்டு தோறும், குண்டம் விழா வெகுவிமரிசையாக கொண்டாடப்படுவது வழக்கம். அதேபோல், இந்த ஆண்டு விழா, கடந்த, 31ம் தேதி காப்புகட்டுதலுடன் துவங்கியது. தொடர்ந்து, தினமும், காவிரி ஆற்றுக்கு செல்லும் பக்தர்கள், புனித நீராடி, தீர்த்தக்குடங்களுடன் ஊர்வலமாக சென்று, கோவில் முன் நடப்பட்டுள்ள கம்பத்துக்கு ஊற்றி, ஸ்வாமியை வழிபட்டுச் செல்கின்றனர். நாளை (ஏப்., 7) முதல், இரவு, 7 மணிக்கு, மலர்களால் அலங்கரிக்கப்பட்டு திருவீதி உலா வந்து, பக்தர்களுக்கு அருள்பாலிக்கிறார். ஏப்ரல், 13ம் தேதி இரவு, 7 மணிக்கு வடிசோறு வைத்து அம்மனுக்கு படையல் வைக்கின்றனர். 14ம் தேதி அதிகாலை, 5 மணிக்கு பூக்குழி பூஜை நடக்கிறது. அன்று மதியம், 2 மணிக்கு காவிரி ஆற்றுக்கு செல்லும், ஏராளமான பக்தர்கள் புனித நீராடி, ஊர்வலமாக வந்து கோவில் முன் ஏற்படுத்தப்பட்டுள்ள குண்டத்தில் இறங்கி ஸ்வாமிக்கு நேர்த்திக்கடன் செலுத்துகின்றனர். 15ம் தேதி காலை, கிடா வெட்டு, அக்னி சட்டி எடுத்தும், அலகு குத்தியும், பக்தர்கள், ஸ்வாமிக்கு, தங்களது வேண்டுதலை நிறைவேற்றுகின்றனர். அன்று மாலை, மஞ்சள் நீராட்டு விழா நடக்கிறது. ஏற்பாடுகளை கோவில் நிர்வாகிகள், ஊர் பொதுமக்கள் செய்துள்ளனர்.