நாகர்கோவில் : கன்னியாகுமரி பகவதி அம்மன் கோயிலில் நடைபெறும் முக்கிய திருவிழாக்களின் ஒன்று நவராத்திரி விழா. இந்த ஆண்டு இந்த விழா வரும் 24-ம் தேதி தொடங்கி அக்.3-ம் தேதி வரை பத்து நாட்கள் நடக்கிறது. முதல் நாள் 24-ம் தேதி காலை 7 மணிக்கு அம்பாள் கொலு மண்டபத்துக்கு எழுந்தருளும் நிகழ்ச்சி நடக்கிறது. தொடர்ந்து 9-ம் நாள் விழா வரை காலையிலும், மாலையிலும் அம்பாள் பவனி வரும் நிகழ்ச்சியும், சிறப்பு பூஜைகளும், தீபாராதனையும், அன்னதானம் மற்றும் கலை நிகழ்ச்சிகளும் நடைபெறுகிறது. 10-ம் நாள் விழாவான அக்.3-ம் தேதி அதிகாலை 4.30-க்கு சிறப்பு பூஜை நடக்கிறது. 6.30 மணிக்கு அம்பாள் வெள்ளிக்குதிரை மீது அமர்ந்து அருள் பாலிக்கும் நிகழ்ச்சி நடக்கிறது. தொடர்ந்து 10.30-க்கு அன்னதானம் நடக்கிறது. பகல் 12 மணிக்கு அம்பாள் வெள்ளிக்குதிரை மீது அமர்ந்து மகாதானபுரம் நோக்கி புறப்படுவார். பஞ்சலிங்கபுரத்தில் ஆராட்டு முடிந்ததும் வாண வேடிக்கை நடைபெறும். பின்னர் ஸ்ரீகோயில் திரும்பியதும் அம்மன் ஆராட்டு நடைபெறும். விழாவுக்கான ஏற்பாடுகளை தேவசம்போர்டு அதிகாரிகள் செய்துள்ளனர்.

  அருள்மிகு பகவதி அம்மன் திருக்கோயில்