சிருங்கேரி சாரதா பீடத்தின் மகா சன்னிதானம் பாரதீ தீர்த்த ஸ்வாமிகள் தனது 41-ஆவது வருட சாதுர்மாஸ்ய விரதத்தை மேற்கொண்டார். அவரது சீடரும். சமீபத்தில் துறவறமேற்ற சன்னிதானமுமான விதுசேகரபாரதீ ஸ்வாமிகள் தனது முதல் வருட சாதுர்மாஸ்ய விரதத்தை மேற்கொண்டார். வியாசபூஜையான ஆடிப் பவுர்ணமி தினத்தில் வெள்ளியில் அலங்கரிக்கப்பட்ட மண்டபத்தில் முதலில் கணபதி பூஜையைச் செய்துவிட்டு, தொடர்ந்து சாஸ்திர முறைப்படி மூன்று பஞ்சகங்களுக்கு சிறப்பு பூஜையைச் செய்தார். அதில் முதலாவதாக கிருஷ்ண பரமாத்மாவுக்கும். நான்கு சனத்குமாரர்களுக்கும் பூஜை செய்தார். இரண்டாவதாக பகவான் வேத வியாசர் மற்றும் அவருடைய நான்கு சீடர்களான சமந்து, ஜைமினி. வைசம்பாயனர்.பைலர் ஆகியோருக்கு பூஜை செய்தார். மூன்றாவதாக ஆதிசங்கரர், அவருடைய நான்கு சீடர்களான சுரேஷ்வர், பத்மபாதர், தோடகர் ஹஸ்தாமலகர் ஆகியோருக்கு பூஜை செய்தார். கடைசியாக சிருங்கேரி குருபரம்பரைக்கான குருபரம்பரா ஸ்தோத்திரத்தைச் சொல்லி, முந்தைய ஆச்சார்ய ஸ்வாமிகளுக்கு சிறப்பு பூஜை செய்தார்.

பின்னர் சாதுர்மாஸ்ய விரத  சங்கல்பத்தை இரு குருமார்களும் சிருங்கேரி மடத்தின் சம்பிரதாய மரபுப்படி குழுமியிருந்த பக்தர்களின் முன்னிலையில் எடுத்துக்கொண்டார். இந்த விரதத்தை வரும் செப்டம்பர் 28- ஆம் தேதிவரை மேற்கொள்வார்கள்.