ஸ்ரீரங்கத்தில் அரையர் சேவைக்கென்று அலங்காரமோ, உடையோ எதுவும் செய்து கொள்வதில்லை. கூம்பு வடிவ குல்லாவை தலையில் அணிந்து கொண்டுபெருமாளுக்கு சூடிக் களைந்த மாலை, பரிவட்டம் அணிந்து கொள்வர். பாசுரங்களைப் பாடும்போது, அதற்கேற்ப முகம், கை பாவத்தைக் காட்டி அரையர் நடிப்பார். அரையர் சேவையில் முத்துக்குறி என்னும் நிகழ்ச்சிக்காக அரையர் பட்டு உடுத்துவார். முத்துக்குறி என்பது குறிசொல்பவளிடம் மகளின் எதிர்காலம் பற்றி தாய் குறி கேட்பதாகும். முத்துக்குறியைக் காண வரும் ஆண்களும், பெண்களும் பட்டு உடுத்தி வருவது மரபாகும். ஒரே அரையரே தாயாகவும், மகளாகவும், குறிசொல்பவளாகவும் மாறிமாறி அபிநயத்தோடு பாடி ஆடுவது சிறப்பானதாகும்.