ஒரு மந்திரத்தில் ஸித்தி எய்துவதற்காக, அதை அக்ஷரலக்ஷம் என்ற வகையில் தொடர்ந்து ஒருமைப்பாட்டுடன் தனியே இருந்து ஜபம் செய்வதற்கு  புரஸ்சரணம் என்று பெயர். உருவேறத் திருவேறும் என்பது நாம் நினைவில்கொள்ள வேண்டிய ஒரு பழமொழி. ஜபக் கணக்கில் பத்தில் ஒரு பங்கு  ஹோமம் செய்ய வேண்டும், ஹோமத்தில் பத்தில் ஒரு பங்கு தர்ப்பணம் செய்ய வேண்டும், அதில் பத்தில் ஒரு பங்கு நல்லவர்களுக்கு  உணவிடுவதைச் செய்ய வேண்டும் - இப்படிப் பூர்த்தி செய்வது புரஸ்சரணம் எனப்படும். உதாரணமாக ஒரு லட்சம் தடவை ஜபம் செய்வதாக  வைத்துக்கொள்வோம். அதற்கு 10,000 தடவை ஹோமம், 1000 தடவை தர்ப்பணம், 100 நல்லவர்களுக்கு உணவிடுவது என்று அமையும்-இந்த  முறையில் பண்டை நாளில் புரஸ்சரணம் வழக்கத்தில் இருந்திருக்கிறது. தற்காலத்தில் புரஸ்சரணம் என்பது பெரும்பாலும் இறைவன் நாமத்தை  முறையாக ஒரு குறிப்பிட்ட எண்ணிக்கை வரையில் ஜபம் செய்து, பிறகு ஹோமம் முதலிய கிரியைகளைச் செய்தல் என்பதைக் குறிக்கும்.  புரஸ்சரணம் செய்யும் போது, ஹோமம் முதலிய கிரியைகளுக்குப் பதிலாக ஜபம் செய்யும் எண்ணிக்கையை அதிகப்படுத்திக்கொள்ளவும் இடம்  உண்டு என்று, சுவாமி பிரம்மானந்தர் கூறியுள்ளார். சிரத்தையுள்ள சாதகர்கள், தாங்கள் செய்யும் ஆத்மசாதனங்களைப் பிறருக்குப் பகிரங்கப்படுத்த  விரும்பமாட்டார்கள். எனவே ஹோமம் முதலிய கிரியைகளுக்குப் பதிலாக, ஜபம் செய்யும் எண்ணிக்கையை அதிகப்படுத்திக் கொள்வது உத்தமம்  என்று எனக்குத் தோன்றுகிறது. இரண்டையும் அதாவது, முதலில் சொன்ன கிரியைகளையும் செய்து, ஜபத்தையும் அதிகப்படுத்துவது மிகமிக  உத்தமம் எனலாம்.