திருவாரூர், பேரளம் அருகே, திருமீயச்சூர் லலிதாம்பாள் சமேத மேகநாத சுவாமி கோவில் தேரோட்டம் நேற்று நடந்தது. திருவாரூர் மாவட்டம், பேரளம் அருகே, திருமீயச்சூரில், வேளாக்குறிச்சி ஆதீனத்திற்கு சொந்தமான, லலிதாம்பாள் சமேத மேகநாத சுவாமி கோவில் உள்ளது. இக்கோவிலின் பிரம்மோற்சவம், கடந்த 24ல், விக்னேஸ்வரர், வாஸ்து சாந்தி பூஜைகளுடன்துவங்கியது. பிரதான உற்சவமான தேரோட்டத்தை முன்னிட்டு, மேகநாத சுவாமி, லலிதாம்பாள், விநாயகர், சண்டிகேஸ்வரர், வள்ளி, தெய்வானையுடன் சுப்ரமணியர் உற்சவர்கள், நேற்று முன்தினம் இரவு, தேரில் எழுந்தருளினர். வேளாக்குறிச்சி ஆதீனகர்த்தர் சத்தியஞான மகாதேவ தேசிக பரமாச்சாரிய சுவாமிகள், வடம்பிடித்து தேரோட்டத்தை துவக்கி வைத்தார். பக்தி கோஷங்களுடன் பக்தர்கள் வடம் பிடித்து தேரை இழுத்தனர். கீழ வீதி, தெற்கு வீதி, மேல வீதி, வடக்கு வீதி வழியாக, மாலையில், தேர் நிலையை வந்தடைந்தது.