இறைவன் விரும்பிய இடத்தில் ஏழு கடல்களின் அம்சத்துடன் கூடிய தீர்த்தங்கள் தோன்றியுள்ளன. இவற்றை, சப்த சாகர தீர்த்தங்கள் என்பர். இறைவன் பலமுறை இத்தகைய கடல் தீர்த்தங்களைப் படைத்திருக்கிறான் என்பதைப் புராண வரலாறுகள் கூறுகின்றன.

இறைவன் மண்மீது மாமன்னனாக வந்து மதுரையில் மீனாட்சி அம்பிகையை மணந்து முடிபுனைந்து அரசாட்சி செய்தார். அப்போது மீனாட்சியின் தாயான காஞ்சன மாலையார் மருமகனான சிவபெருமானிடம் கடல் நீராட விரும்புவதாகக் கூறினாள். சிவபெருமான் நீங்கள் கடலைத் தேடிச் செல்ல வேண்டாம். கடலையே இங்கு வரவழைக்கிறேன். என்று கூறினார். அவரது விருப்பத்தை உணர்ந்த ஏழு கடல்களும் மதுரையில் ஒரே தீர்த்தமாகத் தோன்றின. அதற்கு ஏழு கடல் தீர்த்தம் என்பது பெயர். அந்தத் தீர்த்தத்தின் கரையில் காஞ்சன மாலையார் கோயில் உள்ளது. குந்தி தேவிக்காக ஏழு கடல்களும் திரண்டு வந்து தீர்த்தம் ஆனதலம் நல்லூர் ஆகும். உபமன்யு முனிவர் பால் வேண்டி அழுதார். பெருமான் அவருக்காகப் பாற்கடலையே அங்கு அழைத்துப் பாலூட்டும்படி செய்தார். மணிவாசகப் பெருமானுக்காகவும் ஒருமுறை பாற்கடலை அழைத்ததாகக் கூறுகின்றனர். அது, திருப்பாற்கடல் தீர்த்தம் எனும் பெயரில் சிதம்பரத்தில் உள்ளது.