திருச்சி: ஸ்ரீரங்கம் ரெங்கநாதர் கோவிலில் சித்திரை திருவிழாவை முன்னிட்டு, தேரோட்டம் கோலாகலமாக நடைபெற்றது. சித்திரை வீதிகளில் மக்கள் வெள்ளத்தின் மத்தியில் தேர் அசைந்தாடி வந்தது.

ஸ்ரீரங்கம் ரெங்கநாதர் கோவில் சித்திரை தேர்த்திருவிழா கடந்த 17ம்தேதி கொடியேற்றத்துடன் தொடங்கியது. விழாவை முன்னிட்டு தினமும் பல்வேறு வாகனங்களில் நம்பெருமாள் வீதி உலா வந்து பக்தர்களுக்கு அருள்பாலித்தார். விழாவின் முக்கிய நிகழ்ச்சியான தேரோட்டம் இன்று(25ம் தேதி) நடைபெற்றது. இதற்காக நம்பெருமாள் கண்ணாடி அறையில் இருந்து தோளுக்கினியானில் அதிகாலை 3.45 மணிக்கு புறப்பட்டு 4.15 மணிக்கு சித்திரை தேர் மண்டபம் வந்தடைந்தார். பின் 5 மணிக்கு நம்பெருமாள் திருத்தேரில் எழுந்தருளினார்  சிறப்பு பூஜைகளுக்கு பின் காலை 6 மணிக்கு தேரோட்டம் கோலாகலமாக நடைபெற்றது. ஏராளமான பக்தர்கள் வடம் பிடிக்க, சித்திரை வீதிகளில் மக்கள் வெள்ளத்தின் மத்தியில் தேர் அசைந்தாடி வந்தது.