ஈரோடு:ஈரோடு மாவட்டம் பவானி சங்கமேஸ்வரர் கோவில், குப்பை கூளமாக குவிந்துள்ளதால், பக்தர்கள் முகம் சுழிக்கின்றனர்.ஈரோடு மாவட்டத்தில் புகழ் பெற்ற கோவில்களில், பவானி சங்கமேஸ்வரர் கோவிலும் ஒன்று. பவானி, காவிரி, அமுத நதி ஆகிய மூன்று நதிகளும் ஒன்றாக இணைவதால், கூடுதுறை என்ற சிறப்பு பெயர் கொண்டது. மேலும், காசிக்கு இணையாக கூடுதுறை விளங்குவதால், மாவட்டத்தின் பல பகுதிகளில் இருந்தும் தினமும் ஆயிரக்கணக்கான பக்தர்கள் கோவிலில் குவிகின்றனர்.தற்போது, சபரிமலை சீஸன் களை கட்டியுள்ளதால், சபரி மலைக்கு செல்லும் பக்தர்களும், பவானி மற்றும் அதன் சுற்று வட்டாரப் பகுதியை சேர்ந்த ஐயப்ப பக்தர்களும் சங்கமேஸ்வரர் கோவிலில் குவிகின்றனர். ஐயப்ப சீஸன் களை கட்டியுள்ளதால், சங்கமேஸ்வரர் கோவில் வளாகத்துக்குள் தற்காலிக கடைகள் துவக்கப்பட்டுள்ளது. கோவிலுக்குள் வரும் ஐயப்ப பக்தர்கள், தாங்கள் கொண்டு வந்த தின்பண்டங்களையும், உணவுப் பொருட்களையும் உண்ட பின், கோவில் வளாகத்துக்குள்ளேயே, குப்பை கழிவுகளை போட்டு செல்கின்றனர்.கோவில் வளாகம் சுத்தம், சுகாதாரமின்றி உள்ளது. இதுகுறித்து பக்தர்கள் சிலர் கூறுகையில், ""சபரிமலை பக்தர்கள் வருகை அதிகரித்துள்ளதால், சங்கமேஸ்வரர் கோவிலில் பக்தர்கள் கூட்டம் அலைமோதுகிறது.கோவில் வளாகம் முழுவதும், பக்தர்கள் பயன்படுத்தி வீசிய குப்பை, கூளங்களால், மிதக்கிறது. கோவிலை சுற்றி பிளாஸ்டிக் பொருட்களும், கழிவுகளும் உள்ளதால், இயற்கை மாசுபடுகிறது. எனவே கோவில் வளாகத்துக்குள் பிளாஸ்டிக் பொருட்கள் பயன்பாட்டை தடை செய்ய வேண்டும், என்றனர்.