புரட்டாசியில் தேவியை கலைமகள், அலைமகள், மலைமகள் என்னும் மூன்று அம்சங்களில் வழிபடுகிறோம். இராமன் இராவணனுடன் போர் புரியும் முன், நவராத்திரி விரதம்மிருந்து துர்க்கையை வழிபட்டு வெற்றி பெற்றதாகக் கூறப்படுகிறது. இன்று அம்பிகையை வராகியாக அலங்கரித்து கோதுமை பொங்கல், சர்க்கரைப் பொங்கல், காராமணி சுண்டல் படைத்து வழிபட வேண்டும். அம்பிகைக்கு மலர்க்கோலம் இட்டு செண்பகம், குங்கும அர்ச்சனை செய்து வராகி தேவியை வழிபட வேண்டும். அம்பிகையை வராஹியாக அலங்கரிக்க வேண்டும். பன்றி முகம் கொண்ட இவளை வழிபட்டால் பகைவர் பயம் நீங்கும். போர்படை தலைவி, போர்குணம் கொண்ட ஸ்ரீ ராஜராஜேஸ்வரி தேவியின் வலது முன் கையில் பஞ்சபாணத்திலிருந்து தோன்றியவள் வராகி.செவ்வரளி, செந்தாமரை உள்ளிட்ட மலர்களால் பூஜிப்பதால், ஆனந்தம் கொண்டு பக்தர்களுக்கு அருள்பாலிக்கிறாள்.

வராகி மாலை ஸ்தோத்ரத்தை படித்து பாராயணம் செய்வதால், பகை, விரோதம், குரோதம், துர்க்குணம், துர்புத்தி, கெட்ட செயல், தீய எண்ணங்கள் மறைகிறது. எதிரிகளின் தொல்லையும் மறைகிறது.பக்தியுடன், நெஞ்சுருகி வராகியை வேண்டினால், கலி வந்து அணுகாமல் காத்திடுவாள் வராகி. இன்று மனமுருகி வராகியை வணங்கினால், வாழ்வில் ஏற்றமும் மாற்றமும் அளிப்பாள். இன்று கொலுவில் வீற்றிருக்கும் வராகி அம்பாளை வழிபடுவோம்.. வியாபார வளர்ச்சி, குறையில்லாத வாழ்வு பெறுவோம்!