பழநி, கார்த்திகை மாதம் சபரிமலை சீசன், காரணமாக பழநியில் துளசி மாலை, பூஜைப் பொருட்கள் விற்பனைக்கு வந்துள்ளது. கார்த்திகை மாத பிறப்பை முன்னிட்டு, பழநி கோயிலுக்கு கர்நாடகா, ஆந்திரா உள்ளிட்ட வெளிமாநில ஐயப்ப பக்தர்கள் வரத்துவங்கியுள்ளனர். மாலை அணிவதற்கான பிரத்யேகப் பொருட்களான, சுவாமி சிலைகள், விசேஷ துளசி, ருத்ராட்சம், ஸ்படிகம், சந்தான மாலைகள், வாங்கிச் செல்வதில் வெளிமாநில பக்தர்கள் அதிக ஆர்வம் காட்டுகின்றனர். இவ்வாண்டு ஸ்படிகம், துளசி மாலைகளின் விலை கடந்தாண்டை காட்டிலும் ரூ.20 முதல் ரூ.50 வரை அதிகரித்துள்ளது. பழநி வியாபாரி மனோகர் கூறுகையில், கார்த்திகை மாதம் ஐயப்பன் சீசனை முன்னிட்டு ரூ.50 முதல் 500 வரை துளசி மணி மாலையும், ரூ.300 முதல் 1500 வரை விலையில் ஸ்படிகம், நவகண்டி மாலை மற்றும் சுவாமி சிலைகள், பூஜைப்பொருட்களையும் ஆர்வத்துடன் வாங்கிச் செல்கின்றனர். தற்போது விற்பனை மந்தமாக உள்ளது. சிலநாட்களில் வியாபாரம் அதிகரிக்கும் என எதிர்பார்க்கிறோம் என்றார்.