புதுச்சேரி: புதுச்சேரி அப்பா பைத்தியம் சுவாமி கோவிலில், குரு பூஜை விழா நடந்தது. புதுச்சேரி வீமகவுண்டன்பாளையம், கோரிமேடு சாலையில் அப்பா பைத்தியம் சுவாமிகள் கோவில் அமைந்துள்ளது. இங்கு, அப்பா பைத்தியம் சுவாமிகளின் பிறந்தநாளையொட்டி, குருபூஜை விழா நடந்தது.

காலை 7:00 மணிக்கு திருவிளக்கு வழிபாடுடன் பூஜைகள் துவங்கின. தொடர்ந்து, புனித நீர் வழி பாடு, ஆன் ஐந்து வழிபாடு, மூத்த பிள்ளையார் வழிபாடு, 8:00 மணிக்கு வேள்வி வழிபாடு, பேரொளி வழிபாடும், 10:00 மணிக்கு திருமஞ்சனம் மற்றும் திருக்குட நன்னீராட்டும் நடந்தது. பகல் 12:05 மணிக்கு மலர் போற்றி, பேரொளி வழிபாடு, தொடர்ந்து அன்னதானம் வழங்கப்பட்டது.  முன்னாள் முதல்வர் ரங்கசாமி தலைமை தாங்கி, பூஜைகளை நடத்தியதுடன், அன்னதானத்தை துவக்கி வைத்தார். நிகழ்ச்சியில், என்.ஆர்.காங்., எம்.எல்.ஏ.க்கள் அசோக் ஆனந்து, சந்திர பிரியங்கா, முன்னாள் சபாநாயகர் சபாபதி மற்றும் முன்னாள் அமைச்சர்கள், முன்னாள் எம்.எல். ஏ.,க் கள், வாரிய தலைவர்கள், கட்சி பிரமுகர்கள், பொதுமக்கள் ஆயிரக்கணக்கில் பங்கேற்றனர்.