மேட்டுப்பாளையம்: காரமடை அரங்கநாதர் கோவிலில், மாசிமகத் தேர்த்திருவிழா கொடியேற்றம் வரும், 13ம் தேதியும், தேரோட்டம், 19ம் தேதியும் நடைபெற உள்ளது. கோவை மாவட்டத்தில் வைணவ ஸ்தலங்களில் மிகவும் பிரசித்தி பெற்றது, காரமடை அரங்கநாதர் கோவில். இங்கு மாசிமகத் தேரோட்டம் வெகுவிமரிசையாக கொண்டாடப்படுவது வழக்கம்.இந்தாண்டு தேர்த்திருவிழா வரும், 12ம் தேதி கிராமசாந்தி, 13ம் தேதி கொடியேற்றத்துடன் துவங்குகிறது. அன்னவாகனம், சிம்மவாகனம், அனுமந்தவாகனம், கருடவாகனம் ஆகிய வாகனங்களில் அரங்கநாதர் சுவாமி திருவீதி உலா நடைபெற உள்ளது.

பின், 17ம் தேதி பெட்டத்தம்மன் அழைப்பும், 18ம் தேதி காலை திருக்கல்யாண உற்சவமும், அன்று இரவு யானை வாகன உற்சவமும் நடைபெறுகிறது.19ம் தேதி காலை ஸ்ரீதேவி, பூதேவி சமேதராக அரங்கநாதப் பெருமாள் தேருக்கு எழுந்தருள்கிறார். மதியம், 2:45 மணிக்கு தேரோட்டம் நடைபெற உள்ளது. அதைத் தொடர்ந்து தண்ணீர் சேவை, பந்தசேவை நிகழ்ச்சியும், 20ம் தேதி குதிரை வாகனத்தில் பரிவேட்டையும், 21ம் தேதி சஷே வாகனத்தில் தெப்போற்சவமும், 22ம் தேதி சாற்றுமுறை உற்சவமும், 23ம் தேதி விழா நிறைவும் ஆகிய நிகழ்ச்சிகள் நடைபெறுகின்றன.