சிவகங்கை: சிவகங்கை சுப்பிரமணியசுவாமி மற்றும் உருவாட்டி பெரியநாயகி அம்மன் கோயில்களில் பங்குனி திருவிழாவை முன்னிட்டு தேரோட்டம் நடைபெற்றது.

சிவகங்கை விஸ்வநாதர் கோயில் வளாகத்தில் உள்ள சுப்பிரமணிய சுவாமி சன்னதியில் பங்குனி திருவிழா மார்ச் 12ம் தேதி கொடியேற்றத்துடன் துவங்கியது. தினமும் சுப்பிரமணியர், வள்ளி தெய்வானையுடன் பல்வேறு வாகனங்களில் வீதி உலா வந்தார்.

விழாவின் 9ம் நாளான நேற்று (மார்ச்., 20ல்) காலை அலங்கரிக்கப்பட்ட தேரில் காலை 9:00 மணிக்கு வள்ளி தெய்வானையுடன் சுப்பிரமணியர் எழுந்தருளினார். சுவாமிக்கு சிறப்பு அபிஷேக ஆராதனை நடந்தது.

மாலை 4:00 மணிக்கு தேரோட்டம் துவங்கி, அரண்மனைவாசல், நேரு பஜார், மதுரை முக்கு, மேலரத வீதி, சத்தியமூர்த்தி தெரு வழியே கோயிலை அடைந்தது. பக்தர்கள் அரோகரா கோஷம் முழங்க சுப்பிரமணியரை வழிபட்டனர். தேவஸ்தான மேலாளர் இளங்கோ, கவுரவ கண்காணிப்பாளர் ராமசாமி, கண்காணிப்பாளர் வேல்முருகன் உள்ளிட்டோர்
பங்கேற்றனர்.

உருவாட்டி: பெரியநாயகி அம்மன் கோயிலில் மார்ச் 12 ம் தேதி கொடியேற்றத்துடன் பங்குனி திருவிழா துவங்கியது. தினமும் அம்மன் பல்வேறு அலங்காரங்களில் எழுந்தருளினார். விழாவின் 9ம் நாளான நேற்று (மார்ச்., 20ல்) காலை 5:00 மணிக்கு அலங்கரிக்கப்பட்ட தேரில் அம்மன் எழுந்தருளினார். சிறப்பு அபிஷேகத்திற்கு பின் தேரோட்டம் நடைபெற்றது.

ஆயிரக்கணக்கான பக்தர்கள் அம்மனை வழிபட்டனர். தேவஸ்தானம் மற்றும் விழாக் குழுவினர் ஏற்பாட்டை செய்தனர்.