பெண்ணாடம்:பங்குனி மாத கிருத்திகையை முன்னிட்டு, பெண்ணாடம் அழகிய காதலி அம்மன் உடனுறை பிரளயகாலேஸ்வரர் கோவிலில் வள்ளி தெய்வானை சமேத முருகருக்கு, சிறப்பு பூஜை நடந்தது.

இதையொட்டி, நேற்று முன்தினம் (ஏப்., 8ல்) 8:00 மணியளவில் மூலவர் பிரளயகாலேஸ்வரர், அழகிய காதலி அம்மன் சுவாமிகளுக்கு சிறப்பு பூஜை நடந்தது. தொடர்ந்து, மாலை 6:00 மணியளவில் வள்ளி, தெய்வானை, முருகர் சுவாமிக்கு பால், தயிர், சந்தனம், பன்னீர், இளநீர், திரவியப்பொடி உள்ளிட்ட பொருட்களால் அபிஷேகம், மாலை 6:30 மணியளவில் மகா தீபாராதனை நடந்தது.விருத்தாசலம் முருகர் கோவில்களில் கிருத்திகை சிறப்பு வழிபாடு நடந்தது.

விருத்தாசலம், மணவாளநல்லூர் கொளஞ்சியப்பர் கோவிலில் கிருத்திகையையொட்டி விநாயகர், கொளஞ்சியப்பர் சுவாமிகளுக்கு பால், தயிர், இளநீர், சந்தனம், மஞ்சள், தேன், நெய், பஞ்சாமிர்தம் உள்ளிட்ட வாசனை திரவியங்களால் சிறப்பு அபிஷேகம் செய்து, மலர் மாலைகளால் அலங்கரித்து, மகாதீபாராதனை நடந்தது.

அதேபோல், வேடப்பர் கோவிலிலும் சிறப்பு அபிஷேகம் செய்து, மகா தீபாராதனையுடன் வழிபாடு நடந்தது.