தர்மபுரி: தர்மபுரி அடுத்த, அன்னசாகரம் தண்டுபாதை சாலையில் உள்ள, ஆதிசக்தி அங்காள பரமேஸ்வரி அம்மன் கோவிலில், லட்சார்ச்சனை விழாவை முன்னிட்டு, அம்மனுக்கு திருக் கல்யாணம் நடந்தது. அன்னசாகரம் தண்டுபாதை சாலையில் உள்ள, ஆதிசக்தி அங்காளபரமேஸ்வரி அம்மன் கோவிலில், லட்சார்ச்சனை விழாவையொட்டி, கடந்த, 3 காலை, 6:00 மணிக்கு, கணபதி வழிபாடு நடந்தது. தொடர்ந்து அம்மனுக்கு, 108 மஞ்சள் குடநீர் அபிஷேகம் செய்யப்பட்டது. காலை, 8:00 மணிக்கு, லட்சார்ச்சனை மற்றும் மஹா தீபாராதனை நடந்தது. இதேபோல், அடுத்தடுத்த நாட்களில், காலை, 6:00 மணிக்கு, 108 இளநீர், 108 பழச்சாறு, 108 பால்குடம், 108 தயிர்குடம் ஆகியவற்றை கொண்டு, அம்மனுக்கு சிறப்பு அபிஷேகம் மற்றும் லட்சார்ச்சனை செய்யப்பட்டது. 7 காலை, 8:00 மணிக்கு, பொங்கல் வைத்தல், 12:00 மணிக்கு கூழ் ஊற்றுதல், 6:00 மணிக்கு திரு விளக்கு பூஜை மற்றும் மஹா தீபாராதனை நடந்தது. நேற்று காலை, 10:00 மணிக்கு மேல், ஆதிசக்தி அங்காள பரமேஸ்வரி அம்மனுக்கு, திருக்கல்யாணம் நடந்தது. பின், 12:00 மணிக்கு மேல், பக்தர்களுக்கு அன்னதானம் வழங்கப்பட்டது. மாலை, 6:00 மணிக்கு, அம்மன் ஊர்வலம் மற்றும் கொடியிறக்கம் நடந்தது.