ஆனைமலை;கோட்டூர் மாகாளியம்மன் கோவிலில் நேற்று காலை, பக்தர்கள் குண்டம் இறங்கி அம்மனுக்கு நேர்த்திக்கடன் செலுத்தினர்.கோட்டூர், பழனியூர் மாகாளியம்மன் கோவிலில் நடப்பாண்டுக்கான குண்டம் திருவிழா, கடந்த, 6ம் தேதி கொடியேற்றத்துடன் துவங்கியது. தொடர்ந்து, 10ம் தேதி காலை, 7:00 மணிக்கு அம்மன் அபிஷேகம், மாவிளக்கு எடுத்தல் மற்றும், இரவு, 7:00 மணிக்கு பூவோடு எடுத்தல் நடந்தது. நேற்று முன்தினம் மதியம், 12:00 மணிக்கு அம்மன் திருக்கல்யாணம், மாலை, 4:00 மணிக்கு திருத்தேர் வடம் பிடித்தல், இரவு, 10:00 மணிக்கு குண்டம் கட்டுதல் மற்றும் பூ வளர்த்தல் நிகழ்ச்சி நடந்தது.நேற்று காலை, 7:00 மணிக்கு திருவிழாவின் முக்கிய நிகழ்வான குண்டம் இறங்குதல் நிகழ்ச்சி நடந்தது. விரதமிருந்த நுாற்றுக்கும் மேற்பட்ட பக்தர்கள் பூக்குண்டம் இறங்கி அம்மனுக்கு நேர்த்திக்கடன் செலுத்தினர். பெண்கள் குண்டத்தில் இருந்த பூ அள்ளிக்கொடுத்து வழிபட்டனர். குண்டத்தை சூழ்திருந்த பக்தர்கள், பக்தி பரவசத்தில், தாயே பராசக்தி, ஆதிபராசக்தி என கோஷமிட்டு, அம்மனை மனமுருகி வழிபட்டனர். குண்டம் இறங்குதல் முடிந்ததும், மாலை, 3:00 மணிக்கு தேர் வடம் பிடித்தல் நடந்தது. இன்று, 13ம் தேதி காலை, 8:00 மணிக்கு தேர் திருவீதி உலா, மஞ்சள் நீராடுதல், மாலை, 5:00 மணிக்கு திருத்தேர் நிலை நிறுத்தம் நடக்கிறது.