பெ.நா.பாளையம்: கவுண்டம்பாளையம் சிவ நகர் சிவாலயத்தில், 17ம் ஆண்டு விழா மற்றும் அமாவாசையை ஒட்டி மகா சிவ 108 லிங்கங்கள் பிரதிஷ்டை செய்து வழிபாடு நடத்தப்பட்டன.

கவுண்டம்பாளையம் சிவ நகர் பகுதியில் ஆதி மங்கள விநாயகர் திருக்கோயிலில் சிவபெருமான் ஆலயம் உள்ளது. இங்கு மகா சிவ, 108 லிங்கங்கள் பிரதிஷ்டை செய்து வழிபாடுகள் நடத்தப்பட்டன. விழாவையொட்டி அதிகாலை மகா சிவ வேள்வி யாகத்தில், 108 மூலிகைகள் கொண்டு வேள்வி நடந்தது. தொடர்ந்து, தீர்த்த குடம் எடுத்தல், மங்களநாயகி உடனமர் மங்களநாதர் திருமேனிக்கு புனித நீராட்டு நடந்தது. தொடர்ந்து, 108 சிவலிங்கத்திற்கு அபிஷேகம் நடந்தது. அலங்கார வழிபாடு, தீபாதாரணை வழிபாடு நிகழ்ச்சிகளில் திரளான பக்தர்கள் கலந்து கொண்டனர். அன்னதானம் வழங்கப்பட்டது. மாலை திருக்கல்யாண உற்சவம் மங்களநாயகி உடனமர் மங்களநாதர் திருவீதி உலா நடந்தது. விழா ஏற்பாடுகளை கோயில் நிர்வாக குழு, பிரதோஷ வழிபாட்டு குழு, பவுர்ணமி மகளிர் குழு மற்றும் ஊர் பொதுமக்கள் செய்து இருந்தனர்.