ஆண்டிபட்டி, : ஆண்டிபட்டி அருகே வேலப்பர் கோயில் வளாகத்தில் சமுதாயக்கூடம் சேதமடைந்து வருவதால் பயன்படுத்துவதில் சிரமம் ஏற்படுகிறது.

சீரமைக்க அதிகாரிகள் நடவடிக்கை எடுக்க வேண்டும்.மேற்கு தொடர்ச்சி மாவூற்று மலை வேலப்பர் கோயிலில் சித்திரை முதல் தேதி விழாவில் ஆயிரக்கணக்கான பக்தர்கள் கூடுவர். மாதாந்திர கார்த்திகை, அமாவாசை, பவுர்ணமி நாட்களில் பலரும் வந்து செல்கின்றனர். கோயில் வளாகத்தில் சிறப்பு நிகழ்ச்சிகள் நடத்துபவர்கள் இங்குள்ள சமுதாயக்கூடத்தை பயன்படுத்துவர். கடந்த பல ஆண்டுக்கு முன் கட்டப்பட்ட சமுதாயக்கூடம் சேதமடைந்துள்ளது. கழிப்பறைகள் உடைந்து கிடக்கிறது. சமுதாயக்கூடம் அருகே போதுமான குடிநீர் வசதி இல்லை. இரும்பு ஜன்னல்கள், கதவுகள் உடைந்து விபத்து ஏற்படுத்துவதாக உள்ளது. எதிரில் பட்டுப்போன நிலையில் உள்ள இரண்டு பெரிய மரங்கள் அப்புறப்படுத்தப்படாமல் உள்ளது. ஊரடங்கு காலத்தில் சமுதாயக்கூடத்தை சீரமைக்கவும், பக்தர்களுக்கு தேவையான வசதிகள் செய்து தரவும் ராஜக்காள்பட்டி ஊராட்சி, ஹிந்து அறநிலையத்துறையினர் நடவடிக்கை எடுக்க வேண்டும்.