அரூர்: பிரதோஷத்தை முன்னிட்டு, சிவன் கோவில்களில் நந்திக்கு சிறப்பு அபிஷேகம் மற்றும் அலங்காரம் நடந்தது.

தர்மபுரி மாவட்டம், அரூர் சந்தைமேட்டிலுள்ள, வாணீஸ்வரர் கோவிலில் பிரதோஷத்தையொட்டி, சுவாமிக்கு சிறப்பு அபிஷேகம் நடந்தது. நந்திக்கு பால், இளநீர், தேன் உள்ளிட்ட அபிஷேகங்கள் நடந்தன. இதேபோல், அரூர் பஸ் ஸ்டாண்ட் அருகிலுள்ள வர்ணீஸ்வரர் கோவில், பொம்மிடி அருணாச்சல ஈஸ்வரன் கோவில், தீர்த்தமலை தீர்த்தகிரீஸ்வரர் கோவில், தென்கரைகோட்டை நஞ்சுண்டேஸ்வரர் கோவில், புட்டிரெட்டிப்பட்டி சோமேஸ்வரர் கோவில் ஆகியவற்றில் சிறப்பு பூஜை நடந்தது.

* தர்மபுரி, நெசவாளர் காலனி மகாலிங்கேஸ்வரர் கோவில் பிரகாரத்தில் உள்ள நந்திக்கு, மாலை, 4:00 மணிக்கு பால், பன்னீர், தேன், சந்தனம், குங்குமம், இளநீர் உள்ளிட்ட பல்வேறு திரவியங்களால், அபிஷேகம் செய்யப்பட்டது. மாலை, 4:30 மணிக்கு, நந்திக்கு அலங்காரம் செய்து தீபாராதனை காண்பிக்கப்பட்டது. மாலை, 5:00 மணிக்கு மேல், மூலவர் மகாலிங்கேஸ்வரருக்கு, அபிஷேகம் மற்றும் அலங்காரம் செய்யப் பட்டது. இதேபோல், தர்மபுரி கோட்டை மல்லிகார்ஜூனேஸ்வரர் கோவில், கடைவீதி மருதவானேஸ்வரர் கோவில், மொடக்கேரி ஆதிசக்தி சிவன் கோவில், எஸ்.வி.ரோடு ஆதிசிவன் கோவில், பாலக்கோடு பால்வன்னநாதர் கோவில் உள்பட, மாவட்டத்திலுள்ள பல்வேறு சிவன் கோவில்களில் சிறப்பு பூஜைகள் நடந்தன. கொரோனா தடுப்பு நடவடிக்கையாக பக்தர்கள் யாரும் அனுமதிக்கப்படவில்லை.