தஞ்சாவூர் : தஞ்சை பெரிய கோவிலில் ஆடிப் பூர விழாவை முன்னிட்டு, பெருவுடையார், பெரியநாயகி அம்மன் உட்பட, அனைத்து பரிவார தெய்வங்களுக்கும் சிறப்பு அபிஷேகம் நடந்தது.

தஞ்சை பெரிய கோவிலில் ஆண்டுதோறும் ஆடிப் பூர விழாவை முன்னிட்டு, சிறப்பு அபிஷேகம், ஆராதனை நடக்கும். இன்று ஆடிப் பூரம் விழா என்றாலும், நேற்றே ஆடிப் பூரம் காலை 11:24 மணிக்கு துவங்கியதால், பெருவுடையார், பெரியநாயகி அம்மன் திருமேனிக்கு பால், சந்தனம், தயிர், மஞ்சள் உள்ளிட்ட பல்வேறு திரவியங்களால் சிறப்பு அபிஷேகம் நடந்தது.பின், பெரியநாயகி அம்மனுக்கு வளையலால் அலங்காரம் செய்யப்பட்டு இருந்தது. இதைத் தொடர்ந்து, கோவில் நுழைவாயிலில் உள்ள விநாயகர், ராகு, நால்வர், சொக்கநாதர், சப்த லிங்கங்கள், சப்த கன்னிமார்கள், நடராஜர், வாராஹி அம்மன் உள்ளிட்ட அனைத்து பரிவார தெய்வங்களுக்கும் பால், சந்தனம், தயிர், மஞ்சள் உள்ளிட்ட திரவியங்களால் அபிஷேகம் நடந்தது.