ராமேஸ்வரம்: ராமேஸ்வரம் கோயில் அக்னி தீர்த்த கடற்கரையில் படிக்கட்டுகள் சேதம்டைந்து கிடப்பதால், பக்தர்கள் அவதிபடுகின்றனர்.

ராமேஸ்வரம் ராமநாதசுவாமி கோயிலுக்கு வரும் பக்தர்கள் வசதிக்காக மத்திய, மாநில அரசு பல கோடி ரூபாய் செலவில் அக்னி தீர்த்த கடற்கரை அழகுபடுத்துதல், உடை மாற்றும் அறை, நடைமேடை, பூங்கா அமைத்தது. இந்நிலையில் இரு ஆண்டுக்கு முன் ரூ. 10 லட்சத்தில் அக்னி தீர்த்த கடற்கரையில் நகராட்சி நிர்வாகம் சிமெண்ட் சிலாப்பில் படிக்கட்டுகள் அமைத்தது. கடல் அலையை தடுக்கும் வகையில் அமைத்த படிக்கட்டுக்கு சமூக ஆர்வலர்கள் எதிர்ப்பு தெரிவித்தனர். இதனை நகராட்சி நிர்வாகம் கண்டு கொள்ளாத நிலையில், சில மாதம் முன் வீசிய ராட்சத அலையில் படிக்கட்டுகள் உடைந்து, அக்னி கடற்கரை கரடுமுரடான பாதையாக மாறி கிடக்கிறது. இதனால் பக்தர்கள் கடலில் இறங்கி நீராட முடியாமல் அவதிபட்டும், பலர் காயம் அடைகின்றனர். எனவே உடைந்து கிடக்கும் சிமென்ட் சிலாப் கற்களை அகற்றி இயற்கையான மணல் பரப்பில் சென்று பக்தர்கள் நீராட கலெக்டர் சந்திரகலா நடவடிக்கை எடுக்க வேண்டும்.