சூலூர்: சித்த நாயக்கன்பாளையத்தில் நடந்த தேரோட்ட விழாவில் ஏராளமான பக்தர்கள் பங்கேற்று வடம் பிடித்தனர்.

சூலூர் அடுத்த சித்தநாயக்கன் பாளையத்தில் உள்ள ஸ்ரீ மாரியம்மன் மற்றும் ஸ்ரீ மாகாளியம்மன் கோவில் பழமையானது. செலக்கரச்சல் மற்றும் சித்தநாயக்கன் பாளையம் உள்ளிட்ட ஐந்து கிராமங்களுக்கு பாத்தியப்பட்ட இக்கோவில்களில், ஆண்டு தோறும் வைகாசி மாதத்தில் பூச்சாட்டு மற்றும் தேர் திருவிழா நடப்பது வழக்கம். கடந்த, 3 ம்தேதி பண்டிகை சாட்டுதலுடன் விழா துவங்கியது. அக்னி கம்பம் நடப்பட்டு, பக்தர்கள் தினமும் கம்பம் சுற்றி ஆடினர். அம்மனுக்கு தினமும் அபிஷேக, அலங்கார பூஜைகள் நடந்தன. நேற்று மதியம் அனைத்து பகுதிகளில் இருந்தும், பக்தர்கள் பூவோடு எடுத்து ஊர்வலமாக கோவிலுக்கு வந்தனர். மாலை, 4:00 மணிக்கு, தேரோட்ட விழா துவங்கியது. அனைத்து கிராமங்களை சேர்ந்த ஏராளமான பக்தர்கள், வடம் பிடித்து தேர்களை பயபக்தியுடன் இழுத்தனர். தொடர்ந்து அனைவருக்கும் பிரசாதங்கள் வழங்கப்பட்டன.